Dayîkê Aştîye yê Mexmûrî seba wedartişê ambargoyê serê Kampa Mexmûrî 23 rojî yo verê bendê kontrolî yê asayîşê PDKyî de çalakîya roniştişî domnenî
Kampa Multecîyan ya Şehîd Rustem Cûdî (Mexmûr) 63 roj ê hetê hukmatê Başûrê Kurdistanî ra ameye tecrîdkerdene. Rexne û razînêbîyayîşî bibê zî hukmatê Herêma Kurdistanî hema zî semedê ambargoyî eşkera nêkerd.
Rîyê tecrîdê giranî ra nêweşî nêşkenî şirê nêweşxaneyî, karkerî zî nêşkenî karê xo bikê. Coka eşkera ya ke ambargo û tecrîd kampa Mexmûrî de bibo semedê meseleyanê giranan ê merdimî. Seba wedartişê derûdorgirewtişî Dayîkê Aştîye yê Kampa Multecîyan ya Şehîd Rustem Cûdî binê şert û mercanê zoran de zî 23 rojan ra nata verê bendê kontrolî yê asayîşê PDKyî yê mabênê Hewlêr û Mexmûrî de çalakîye de yê. Dayîkê Aştîye yê Mexmûrî şewe û roja xo uca derbas kenî. Heta nika îdarekarê hukmatê Herêma Kurdistanî cewabêk nêda mayan. Dayîkê Aştîye zî vanê kenê ke heta ke tecrîd nêqedo, ê do çalakîya xo rê dewam bikê. MEXMÛR
