Berxwedana Dayikên Aştiyê yên Mexmûrê ya li ber benda kontrolê ya PDK’ê ya ji bo rakirina ambargoya li ser Mexmûrê di roja 23’yemîn de didome. Dayik bi israr in ku heta dorpêç tê rakirin li ber xwe bidin
Ambargoya Hikûmeta Herêma Federal a Kurdistanê ya li ser Wargeha Penaberan a Şehîd Rûstem Cûdî (Mexmûr) di roja 68’emîn de berdewam dike. Tevî hemû bertekên gel û raya giştî jî hikûmeta Başûr têkildarî sedema ambargoyê tu agahiyan nade. Ji ber ambargoya heyî nexweşên ku rewşa wan giran nikarin biçin nexweşxaneyê û nikarin biçin kar.
Ji bo rakirina vê dorpêçê Dayikên Aştiyê yên Wargeha Penaberan a Şehîd Rûstem Cûdî (Mexmûr) tevî şert û mercên dijwar jî ev 23 roj in li benda kontrolê ya PDK’ê ya di navbera Hewlêr û Mexmûrê de li ber xwe didin. Dayikên Aştiyê yên Mexmûrê bi şev û roj li cihê çalakiyê dimînin.
Heta niha rayedarên hikûmeta Herêma Federal a Kurdistanê tu bersiv nedana dayikan. Dayik ji diyar dikin ku heta ku dorpêç bi dawî nebe dê çalakiya xwe bi dawî nekin. MEXMÛR
