Li Amedê, di 3’yê Adarê de HDP’iyan ji bo tecrîda li Îmraliyê bi dawî bibe ketin greva birçîbûnê, bi fermana Soylû hatibûn binçavkirin. Piştî hatin berdan, çalakiya xwe ya greva birçîbûnê li avahiya HDP’ê didomînin
Di 3’yê Adarê de parlementera HDP’ê ya Amedê Dersîm Dag, endamên partiyê Sevîcan Yaşar, Salîha Cansever, Îsmet Yildiz, Salîh Tekîn û Bîlal Ozgezer, ji bo tecrîda li ser Rêberê Gelê Kurd Abdullah Ocalan bi dawî bibe dest bi greva birçîbûnê kiribûn. Lê piştî çalakiya greva birçîbûnê hat destpêkirin bi fermana Wezîrê Karên Navxweyî suleyman Soylû, polîsan avêtibû ser avahiya HDP’a Amedê û endamên HDP’ê hatibûn binçavkirin. Piştî 4 rojan şûnde endamên HDP’ê hatin berdan û li avahiya partiyê çalakiya xwe didomînin.
Ji 3’yê adarê ve gelek kes li avahiya HDP’ê serdana parlementer Dersîm Dag dikin. HDP’a Rezanê û endamên Meclisa Dayikên Aştiyê serdana Dersîm dag kirin û di dema serdanê de jinan dirûşmên ‘Bijî berxwedana zindanan’ , ‘Leyla Guven rûmeta me ye’, ‘Dersîm Dag rûmeta me ye’ û ‘Jin jiyan azadî’ berz kirin.
Serokê Giştî yê TÎP’ê Erkan Baş û parlementerê TÎP’ê yê Hatayê Bariş Atay jî îro serdana hevseroka KCD’ê Leyla Guven kirin û paşê çûn avahiya HDP’a Amedê û serdana çalakgerên greva birçîbûnê ya li avahiya partiyê kirin. AMED
