Xoverdayîşê grevê vêşanîye yê bêdem û anêgêrayîşî yê Hemsereka KCDyî û Parlementera HDPyî Leyla Guvena ke vera tecrîdkerdişê Rayberê Şarê Kurdî Abdullah Ocalanî dabîye dest pêkerdene roja 184. de dewam keno. Sewbîna pêroyê çalakîyê ke badê Guvene dîyayî dest pêkerdene zî bi qerardarî dewam kenî
Çalakîya grevê vêşanîye ya bêdem û anêgêrayîşî ya Hemsereka Kongreya Komela Demokratîke (KCD) û Parlementera Partîya Demokratîke ya Şaran (HDP) ya Colemêrgî Leyla Guvena ke seba wedarnayîşê tecrîdê serê Rayberê PKKyî Abdullah Ocalanî dabî destpêkerdiş roja 184. de dewam kena. Leylaye 8ê Teşrîna Peyêne de Zindanê Amedî de dest bi grevê vêşanîye kerde û badê ke 25ê Çele de serbest ameye veradayene keyeyê xo de çalakîya xo dewam kena. Ganî bêro vîrvistiş ke rewşa weşîya çalakgeran her ke şona xidar bena. Sewbîna 16ê Kanûne de zindananê Tirkîye de zî çalakîya grevê vêşanîye dest pêkerdbî û 1ê Adare de zî vilayê pêroyê zindanan bîye.
Hetê bînî ra xoverdayîşê endamê temsîlkarîya HDPyî yê Başûrê Kurdistanî Nasir Yagizî zî bi eynî amancî sey grevê vêşanîye yê bêdem û bêagêrayîşî dewam keno. Yagiz roja 171. de bi qerardarîye dewam keno.
Xoverdayîşê Strasbourgî yê 14 çalakwanan û Galler de Îmam Şîşî roja 145. de dewam keno. Çalakîya zîndananê Kurdistanî û Tirkîya, ke gruba verêne 16ê kanûne 2018î de dabî destpêkerdene, 146. de dewam kena. 1ê Adare ra dima bi hezaran hepsîyî zîndananê Kurdistanî û Tirkîya dest bi grevê vêşanîye kerdî û çalakîya înan roja 69. de dewam kena. Sewbîna Mexmûr, Hewlêr, Şengal û xeylê cayanê cîya-cîyayan de zî seba piştîdayîşê grevê vêşanîye çalakîyê grevê vêşanîye estî.
Endama Meclîsê Îştarî Fadîle Toke roja 111. de ya. Hemsereka DBPyî ya verê Sebahat Tuncel û ya parlamentera HDPyî ya verê Selma Irmake ke zindan de dayê destpêkerdiş roja 115. de yê û bajarê Toronto yê Kanadayî de zî çalakîya Yusuf Îba ke dayo destpêkerdene roja 119. de dewam keno.
Çalakîya ke Parlementera HDPyî Dersîm Dage 3ê Adare de, Tayîp Temel û Murat Sarisaçî 8ê Adare de awanîya HDPyî de daye destpêkerdene dewam kena. Çalakwananê ke hepisxane de dest bi grevê vêşanîye kerdo û ameyê verdayene, veradayîşî ra dima zî çalakîya xo keye de dewam kenê. Sedat Akin Êlîho ke Zindanê Tîpa Eyî yê Erzinganî ra vejîya 124 rojî, Gurbet Ektîrene Mêrdîn de 115 rojî, Semra Alkan Alîaga yê Îzmîrî de 124 rojî, Îhsan Sinmiş Kuçukçekmece yê Stenbolî de 73 rojî, Mahsun Şen 126 û Mûrat Aksinî zî 57 rojî yo qezaya Dêrikî ya Mêrdînî de grevê vêşanîye de çalakîya xo keye de dewam kenê.
Îsmet Yilmaz, Salîh Tekin, Sevican Yaşare, Bîlal Ozgezer banê HDPyî yê Amedî de 3ê Adare de dest bi grevê vêşanîye kerdibî. Çalakîye ra dima ameyî girewtene û zîndan de çalakîya xo domnayî. Aşmêk ra dima Îsmet Yildiz, Sevîcan Yaşar, Salîh Tekîn û Bîlal Ozgezerî serbest ameyî veradayene û nika keyeyê xo de çalakîya xo dewam kenê.
Nameyê 15 hepsîyê ke dest bi rojeyê mergî kerdî
Asli Dogan: Qezaya Karakoçan ya Elezîzî de ameya dinya. 36 serrî ya. 19 serrî ceza girewta. 14 serrî yo ke zîndan de ya. nika Zîndanê Cinîyan yê Gebze de ya.
Zozan Çîçek: 1992î de bajarê Amedî de ameya dinya. 9 serr û 9 aşmî ceza girewta. 3 serrî yo ke Zîndanê Bakirkoyî yê Cinîyan de ya. 1ê Adare de zî grevê vêşanîye de bî.
Nesrîn Akgul: Qezaya Gimgimî ya Muşî de ameya dinya. 15ê Çeleyî de tewrê grevê vêşanîye bîya. 2008an ra nata tewqîfkerde ya û 18 serrî ceza aye rê ameya birnayene. Nika Zîndanê Bakirkoyî yê Cinîyan de ya.
Şukran Aydin: Erziromî ra ya û 22 serrî ya xo de Dîlok de ameya tepiştene, raştê îşkence ameya û 12 serrî yo ke tewqîfkerde ya. 130 serrî ceza dîyaya aye. Şukrane nika Zîndanê Bakirkoyî yê Cinîyan de ya.
Ardil Çeşme: Qezaya Licê ya Amedî de ameya dinya. 1994î de cezaya muebetî aye rê ameya birnayene. Zîndanê Cinîyan yê Gebze de 1ê Adare de tewrê grevê vêşanîye bîye.
Ahmet Topkaya: Zîndanê Tîpa Dyî yê Amedî de yo. 1ê Adare de grev de bî.
Ferhat Turgay: Zîndanê Tîpa Dyî yê Amedî de yo, cezaya muebetî girewto û tewrê rojeyê mergî bî.
Ergîn Akhan: Muşî ra yo. 2015î de Amedî de ameyo tepiştene û Zîndanê Tîpa Dyî yê Amedî de yo.
Enver Donmez: Qezaya Wêranşarî ya Riha ra yo. Zîndanê Tîpa Dyî yê Amedî de tewqîfkerde yo. 1ê Adare de kewtbî grevê vêşanîye.
Abdulhalik Kaplan: Qezaya Licê ya Amedî ra yo, Zîndanê Tîpa Dyî yê Amedî de tewqîfkerde yo.
Îhsan Bulut: Zîndanê Wanî de yo. 23ê Sibatê de kewt grev vêşanîye û rojeyê mergî de yo.
Ahmet Anigi: 26 serrî yo. Zîndanê Wanî de tewqîfkerde yo. 1ê Adarê de grevê vêşanîye de bî.
Ozhan Ceyran: Zîndanê Wanî de yo. Nika rojeyê mergî de yo.
Vedat Ozagar: Zîndanê Wanî de tewqîfkerde yo. Nika rojeyê mergî de yo.
Erol Çelîk: Zîndanê Wanî de tewqîfkerde yo. Nika rojeyê mergî de yo.Kesê ke seba şermizarkerdişê tecrîdî cuya xo peynî kerdî
Kesê ke seba şermizarkerdişê tecrîdî cuya xo peynî kerdî
Sewbîna teberê welatî de bajarê Krefeldî yê Almanya de 20ê Sibate Ûgûr Şakarî hemverê tecrîdî de adir verda bedenê xo û 22ê Adare de cuya xo kerde vînî. Zulkuf Gezenî (33) 17ê Adare de hemverê tecrîdî de Zîndanê Tîpa F-2 yê Tekîrdagî de, Ayten Beçete (24) 23ê Adare de Zîndanê Gebze de, Zehra Saglame (23) 24ê Adare de Zîndanê Tîpa Tyî yê Otlû de, Medya Çinare (24) 25ê Adare de Zîndanê Tîpa Eyî yê Mêrdînî de peynî ro cuya xo arde. Yonca Akici 29ê Adare de Zîndanê Şakranî yê Cinîyan de çalakî viraşte û 1ê Nîsane de cuya xo vindî kerde. Siraç Yuksekî zî 2ê Nîsane de Zîndanê Tîpa T-2yî yê Osmanîye de û Mahsûm Pamayî zî 5ê Nîsane de Zîndanê Xarpêtî yê bi Asayîşê Berzî de bi heman amacî çalakî viraşte û cuya xo kerde vînî. AMED
