Çalakiya nobetê ya malbatan li ber Girtîgeha Tîpa M a Jinan a Gebzeyê di roja 10’an de didome. Malbatan diyar kir ku ew naxwazin tabût ji girtîgehan derkevin
Çalakiya nobetê ya malbatên girtiyan ku li dijî tecrîdê di greva birçîbûnê ya bêdem û bêdorveger de ne, di 9’ê Nîsanê de li ber Girtîgeha Tîpa M a Jinan a Gebzeyê dan destpêkirin, di roja 10’an de didome. Welatiyên ji bo piştgiriyê bidin çalakiyê ji Stenbolê hatin, polîsan rêya wan birî û nasnameya wan kontrol kirin.
Parlementerên HDP’ê Serpîl Kemalbay, Dîlan Dîrayet Taşdemîr, Zuleyha Gulum û Şevîm Coşkûn jî di nav de gelek kes tev li nobetê bûn.
Girseya ku gihaşt ber Girtîgeha Tîpa M a Jinan a Gebzeyê, polîsan pêşiya wan birî. Polîsan diyar kir ku biryar walîtiyê ye. Li ser vê parlementer Taşdemîr bertek nîşan da û ji polîsan re got ku hûn qanûnê binpê dikin. Polîsan jî ji Taşdemîr re gotin ku ew dewletê temsîl dikin. Piştî munaqişeyeke kin, tenê destûra malbatan hat dayîn û malbatan çalakiya rûniştinê li dar xist.
Li ser navê çalakgeran Hatîce Soyler axivî. Soyle diyar kir ku ew ê her roj nobetê bigirin û wiha got: “Heta tecrîd bi dawî nebe em ê li vir bin. Ger em li vir nesekinin wê ji girtîgehan tabût derkevin. Em naxwazin tabût ji girtîgehan derkevin.” STENBOL
