Çalakwananê rojeyê mergî ra Ardil Çeşme da zanayene ke xoverdayîşê înan dewamê 14’ê Temmuze yo û va: “Ma wezîfeyê xo kerd dora şima ya.”
Grevê vêşanîye yê ke rayberîya Leyla Guvene de semedê wedartişê tecrîdê serê Rayberê Şarê Kurdî Abdullah Ocalanî dest pêkerdî û 1ê Adera ra heme zîndanan ra vila bîyî dewam kenê. Bi nameyê tepişteyanê PKK û PAJKî Denîz Kayayî çend rojî cuwa ver da pêhesnayene ke 15 tepişteyan çalakîya xo ya grevê vêşanîye resna merheleyêka newî û kewtê rojeyê mergî. Çalakwanê ke 30ê Nîsane de dest bi rojeyê mergî kerd ra yewe zî Ardil Çeşme ya.
Rewşa embazanê ma yê grûba verêne xirabêr bena
Ardil Çeşme bi rayîrê telefonî Zîndanê Gebze ra qisey kerd. Çeşme ard ziwan ke hamleya ‘Ma tecrîdî bişiknê, faşîzmî birijnê û Kurdistanî azad bikerê’ bi çalakîya rojeyê mergî kewte merheleyeka neweyî û va: “Zîndananê Kurdistan û Tirkîya de embazê ma 138 rojî yo ke grevê vêşanîye de yê. Zîndanê Gebze de ez û embeze Asli rojeyê mergî de yê. Ma 1ê Adare ra grevê vêşanîye de yê û 30ê Nîsane ra nata zî rojeyê mergî de yê. Embazê ma yê ke grûba verêne yê grevê vêşanîye de yê rewşa înan xirab a. Pişika înan ra gonî yena. Ma tîya 33 embazî grevê vêşanîye de yê. Şertê zîndanî zî xora zaf xirab ê. Tewirê îdareyê zîndanî yê vera çalakwanan her roje zafêr xirab beno. Çîyê ke serranê 1980. de ameyêne kerdene ewro reyna heman çîyî yenê bicaardene.
Tarîxê ma tarîxê xoverdayîşî yo
Çeşme rojeyê mergî sey dewamê xoverdayîşê 14ê Temmuze name kerd û nê vatî: “Tirkîya de rejîmê yew merdimî esto. Eke Tirkîya çareserkerdişê meseleya Kurdî de samîmî ya, ganî her çî ya verê tecrîdê serê Rayberê Şarê Kurdî Abdullah Ocalanî wedarê. Zîndanan de bi hezaran tepişteyî semedê wedartişê tecrîdî grevê vêşanîye de yê û heta ke waştişê ma bêro ca çalakîya ma do dewam bikero. Ganî şarê ma her cayî biaçarnê cayê çalakîyan. Seba ke demo winayên de şarê ma bêveng o, ma zaf dejayeyê. Rîyê bêvengîya AKP û şarî ra ma dest bi rojeyê mergî kerd. Se beno wa bibo, ma do tecrîd bişiknê. Bê serkewtiş yewna rayîrê ma çîn o. Şar ganî qerarê xo bido ci. Wext wextê şorişî yo. Nika waxtê çalakîyan o. Semedê sîyaset û rayapêroyî na hemleya ma ya peyêne ya. Ewro ra tepîya çîyo ke destê ma ra bêro çîn o. Şarî no demî her çî milê zîndanan de verda. Ma zî hendê eşkenê bikerê. Nika dora şima ya. Xoverdayîşê Xeyrî, Mazlûm û Kemalan ewro dewam keno. Şarê ma ganî vera zulmê îqtîdarê faşîstî de milê xo çewt mekero. Tarîxê ma de bêvengîye çîn a.Tarîxê ma tarîxê xoverdayîşî yo. Dewleta tirkî zaf hol zana ke PKK bi hêrişan nêqedîyeno. PKK felsefeya cuye yo. Ma do bi ruhê felsefeya cuye ser bikewê. Ma do rêça Rayber Apo û şehîdanê xo de ser bikewê.” STENBOL
