Parlamenterê HDPyî Alîcan Onlu cayê mezelê sanikanê ‘Doza 49an’ ra Dr. Saît Kirmizitoprako ke sey ‘Dr. Şivan’ yeno naskerdene û 49 serrî verê ameybî kiştene Hetgirê Serekkomar Fûat Oktayî ra pers kerd
Hetgirê Hemserekê Pêroyî yê Partîya Demokratîke ya Şaran (HDP) yê Rêxistibîyayîşî ra berpirsîyar û Parlamenterê Dêrsimî yê HDPyî Alîcan Onlu derheqê kiştişê sanikanê ‘Doza 49an’ ra Dr. Saît Kirmizitoprako ke sey ‘Dr. Şivan’ yeno naskerdene û awankaranê Partîya Demokratîke ya Kurdistanî-Tirkiye (KDP-T) ra yo û embazanê ci Hasan Yikmiş û Hîkmet Buluttekînî de bi waştişê cewabî persêk Hetgirê Serekkomar Fûat Oktayî ra pers kerd. Pêşnîyazê persî dîya Serekatîya Meclîsî. Onlu pêşnîyazê persî de da zanayene ke Kirmizitoprak merdimê ci yo û nê persan pers kerd:
“* Derheqê 55 merdimê Saît Kirmizitoprakî ke Terteleyê Dêrsimî yê 37-38î de ameyî kiştene de malumar arşîvê dewlete de estî?
* Nameyê roşnvîrê ke doza 49an de ameyî tepiştene û mehneyê tepiştişê înan çi yo? Nê roşnvîrî çi ra ameyî sucdarkerdene?
* Kombîyayîşo ke serekkomar, serfermandarê pêroyî, serekwezîr, wezîrê dewlete, wezîrê karê teber û şefê meseleya kurd yê MÎTî yê aye wextî ke tewrê ci bîyî de raporo ke hetê MÎTî ra ame amadekerdene ame munaqeşekerdene û yeno îdîakerdene ke kombîyayîş de nê çîyî ameyî vatene ‘Tirkîya de tay roşnvîrê kurd serewedarnayîşê kurdan rêxistin kenî û yeno texmînkerdene ke komunîstî paştî danî înan. Beno ke hezar roşnvîrê kurdî bêrî muhakemekerdene û daliqnayene.’ Nê îdîayî raştî ya nê?
* Serfermandarê Pêroyî Cevdet Sunay û Serekwezîr Suleyman Demîrelî yê aye wextî Mistefa Barzanî ra waştişê Saît Kirmizîtoprak û embazanê ci derbazê partîya Saît Elçî bibî kerdî?
* Selahîyetdarê KDPyî derheqê cayê mezelê Saît Kirmizîtoprakî de xeber dayî Tirkîya? Cayê mezelê Saît Kirmizîtoprakî kamî ca yo? ANQARA
