Hemserekê Konseya Rayberdişî ya KCKyî Cemîl Bayikî badê erdlerzanê ke bîyî sebebê mergê bi des hezaran kesan, mesajêk weşana veng da hêzanê leşkerîyan ke wa çalakîyanê xo vindarnê. Hemserekê Konseya Rayberdişî ya KCKyî Cemîl Bayikî nê vatî:
”Şarê ma yo birûmet, erdlerz bi sebebê felaketêka girde. Vakurê Kurdîstanî de, Rojawan,Tirkîya û Sûrîye de şar şertanê zaf zehmetan de yo. Bitaybetî rîyê sîyasetê dewelta tirke ya qirkere ra şarî dahîna zaf dej ancenê. Şarê kurd, şarê tirk, şarê ereb û şarê bînî dejanê girdan ancenê.
Çîyo ke komel ciwîyeno zaf tesîrê ma kerd. Ez kesanê ke dinyaya xo bedilnaye, înan rê Hûmayî ra rehmet, birîndaran rê şîfa wazena. Reyna merdimanê kesanê ke dinyaya xo bedilnaya û heme şarê xo rê serweşîye wazena. Ma dejê şima hîskenê û ciwîyenê.
Îqtîdarî qet tedbîrêk nêgirewt
Çi heyf ke erdlerz her ca de, heme dinya de beno. Çîyo muhîm oyo ke heme dewletî tedbîranê erdlerzî genê. Coka dahîna tay zirar zîyan vînenî. Seba ke Tirkîya tedbîran nêgena felaketê wînayên ciwîyenî.
Ganî her kes bibo seferber
Hema binê rijnayîşan de bi hezaran merdimê ma est ê. Şertê zimistanî yê, vewre est a, şilî est a, serd o. Eke kesê ke binê rijnayîşî de yê lezabez mevejîyê, serdî ra dinyaya xo bedilnenê. Aye ro ganî sere de dezgehê demokratîkî, her kes heme îmkananê xo seferber bikero
Tirkîya heme îmkananê xo seba şerî xerc kena
Îqtîdarê AKP-MHPyî 20 serrî yo îqîdar de yo, dewlete îdare keno. Yeno zanayene ke Vakurê Kurdîstanî û Tirkîya serê xeta fayî de yê. Ganî semedê nê tedbîr biameyêne girewtene. La AKPyî qet tedbîrêk nêgirewto. Xizmetê şarî nêkeno. Bi serran o Tirkîya de bajê erdlerzî yeno girewtene. La çew nêzano no pere sera şîyo. Dewleta tirke heme îmkananê xo Kurdîstan de semedê qirkerdişê kurdan şuxulnena. Semedê nê bi mîlyonan dolarî xerc kerdî. Şero taybet aver berd, paştgêrê xo hêzdar kerdî, çeteyî hêzdar kerdî, tay dezgehê şerê taybetî hêzdar kerdî. Heme îmkanê Tirkîya semedê nînan xerc kerdî. Coka tiway nêda şaranê Tirkîya. Bitaybetî zî şarê kurdî. Wextê îqtîdarê xo de zengînî dahîna kerdî zengîn û şar zi tim dahîna beno feqîr.
Ganî şarî paştîdayîşî girdêr bikerê
Eke îqtîdarî butçeya ke seba şerî xerc kerda, semedê tedbîranê erdlerzî bişulnayêne, ewro dejê ma hende giran nêbîyênî. Coka ganî şarî hesabê nê bipersê. Hem wa hesab bêro persayene hem zî paştîdayîş bêro merheleya tewr berze. Îqtîdarî Halê Îstîsnayî îlan kerd ke serê erdlerzî bîgêro. Wazeno ke serê dej û qîrayîşê şarî bîgêro. Seba ke problemê ke ciwîyenê wa çew meeşnawo çapemenîya xo fînaya dewre. Zaf çîyan nimnenê. Wina mojnenê ke her ca de şarî rê hetkarî kenê la no raşt nîyo. Medaya xoser heme zûranê înan vejena werte. Verê hetkarî genê, nêverdenê şar paştî bido yewbînan. Seba ke îqtîdarê ci payra bimano wazenê hetkarîya ke yena bifînê xizmetê xo. Ganî şerê kurd û şarê Tirkîya paştîdayîşê xo girdêr bikerê. Wa musadeyê astengkerdişê îqtîdarî mekerê.
Çalakîyanê leşkerîyan mekerê
Ma zî sey têgêrayîşî rîyê na felakete ra proses, averşîyayîşê peyênî ercnayî û na çarçewe de tay qerarî girwetî. Çunke ma şaran û cuya merdimî rê hurmet kenê. Coka seba ke dejî ser wa dej mebo, ma sey merdimî, vîjdanî û ehleqî rewşe ercna. Ma veng danê heme hêzanê xo ke çalakîyanê leşkerîyan kenê; Tirkîya de, metropol û bajaran de çalakîyanê leşkerîyan vindarnê. Reyna heta ke dewleta tirke mero ma ser, hêrişê ma mekero, ma qerar girewt ke çalakîyan mekerê. Heta ke dejê şarê ma şenik bê, derbê ci bêrê piştene, no qerarê ma vîyartbar o. Xora tewirê dewleta tirke zî qerarê ma de do bibo dîyarker.
Ez reyna kesanê ke dinyaya xo bedilnaye rê Hûmayî ra rehmet, birîndaran rê şîfa wazena. Wa sereyê şarê ma weş bo. Ma do pê paştîdayîşê komelkî nê dejî şenik bikerê. Derbanê xo pîya bipêşê.” BEHDÎNAN
