Cemxane û Kulturê Pir Sultan Abdalî yê Şûbeyê Amedî de 14 aşmîyo ke cereyan ameyo birnayene û tarîtî de yo. Serekê Cemxaneyî Cafer Kolumanî ard ziwan ke cemxane cayê îbadetî yo û waşt ke rafutara cereyanî muaf bêra girewtene
Cemxane û Kulturê Pir Sultan Abdalî yê Şûbeyê Amedî yê Qezaya Rezan yê Amedî 25ê kanûna 2011î de bi merasîmêk ame akerdene. Labelê Şîrketê Anonîmî yê Vilakerdişê Cereyanî yê Dîcle (Dicle Elektrik Dağıtım A.Ş.) seba ke faturaya cemxane nêameya dayene cereyanê cemxaneyî birna. DEDAŞ serra 2018î de cerayanê cemxaneyî birna û 14 aşmîyo ke cemxane de ceryan çin o. Serekê Cemxaneyî Cafer Kolumanî ard ziwan ke cemxane cayê îbadetî yo û waşt ke rafutara cereyanî muaf bêra girewtene û wina va: “Ganî cayê îbadetî yê sey camî, dêr, camxane û sewbîna cayî faturayan ra muaf bêrî girewtene. Ma DEDAŞ gere kerd û ma doze akerd. Doze mehkemaya Huqûqî ya Aslî de ameye akerdene.” AMED
