Endama Merkezê Cigêrayîşî yê Jineolojî û akademîsyene-rojnamegere Nagîhan Akarsele verê keyeyê xo yê taxa Bextîyarî ya Silêmanîye de hetê MÎTê dewleta tirke ra 4ê teşrîna verêne de Başûrê Kurdistanî de amebî qetilkerdene. Badê çend saetan kerdox serê zextê cinîyan û welatîyan de ameybî tepiştiş. Badê ameyîşê endamê keyeyê Nagîhan Akarsel û heyete HDPyî 8ê teşrîna verêne de cenaza Silêmanîye ra ver bi Hewlêrî ameye erşawitiş. Nizdîyê 5 rojan cenaza Hewlerî de ameye vindarnayîş û bi bahaneyanê cîyayan erşawitişê cenaza ameye astengkerdiş.
Her çend ke bilet bêro girewtiş zî fîrmayê hewayî Pegasus û Turk Hava Yollari biletê cenaza red kerdî. Dima keyeyê û heyetê HDPyî cenazaya Nagîhan Akarsele Teyaregehê Hewlêrî ra tepîya berdî û berê sînorî yê Îbrahîm Xelîlî ra derbazê hetê bakurê Kurdistanî kerdî.
Ame dîyîş ke xeylê nuqtayanê cigêrayîşî de cendirmeyî ronîyayî rayîranê Kulu û Cîhanbeylîyî yê Konyaye ser. Rayîrê Karatepeyî ke şono dewa Golyazîyî (Xelîkan) zî hetê polîsanê trafîkî û cendirmeyan ra ameyî girewtiş. Welatîyê ke şîyî dewe zî cigêrayîşê kamîye ra derbaz bîyî.
Cenazaya Akarsele merkezê Cîhanbeylîyî de û dekewtiş dewe de hetê bi seyan kesan ra bi tilîlîyan û silogananê ‘Cinî, Cuye, Azadî’, ‘Şehîd nêmirenî’ û ‘Bijî Serek Apo’ ameye pêşwazîkerdene. KONYA
