Dîmenê 261 cenazayan ê ke Goristanê Kîlyosî de kişta rayîrî de pêser ameyî definkerdene vejîyayî werte. Dîmenan ê ke Ajansê Mezopotamya pare kerde de yeno dîyene ke dewleta tirke senî vera merdayan bêhurmetîye kena û erjanê merdimîye binpay kena.
19ê kanûna 2017î de dewleta tirke Goristanê Garzanî yê Bedlîsî ra 282 cenazayî remnaybî Dezgehê Tipê Edlîyî yê Stenbolî. Cenazayan ra 21 hebî ameybî dayene keyeyan. 261 cenazaye bînî zî Goristanê Kîlyosî de kişta rayîrî de pê tandayîşê lîngan, mîyanê kutuyanê plastîkan de û pêser ameyî definkerdene. Dîmenan de yeno dîyene ke wezîfedarê goristanî kutuyê plastîkî yê cenazayan pê lingê xo tan dano.
Dîmenê na rewşe wexto ke cenazayê Cengîz Demîr û Huseyîn Donerî ameyêne teslîmkerdene, ameyî antene. Dîmenanê 2ê adare de esteyê Demîr û Donerî goranê 6. û 9. ra mîyanê kutuyê plastîkî de yenê dîyenê keyeyanê înan. Cenazaya Demîrî dewa Fîsî ya Licê rê û yê Donerî zî dewa Hizanî ya Bedlîsî ameyî definkerdene.
Birayê Cengîz Demîrî Azad Demîrî îfade kerd ke xîretanê pîlan ra dima ê êşkîyayî ke gorê Cengîzî bivînê la wexto ke şîyê Goristanê Kîlyosî dî ke pêro gorî binê pîsî de yê û kişta rayîrî de yê. Demîrî vat ke cayê nê kerdişî ne exlaqî de ne zî wijdan de esto.
Naja Huseyîn Donerî Gulperî Doner zî da zanayene ke ê seba ke cenaza bigêrê muracatê serdozgerîye kerd û uca de pê hesîyayê ke kekê Huseyînî şehîd Ahmed Doner zî Goristanê Kîlyosî de yo. Gulperî Doner vat: ”Ma 2 mengî verê cû cenazaya Ahmedî gitrewtbi, o wext zî cenazayî wina kişta rayîrî de û pêser bîyî. Ahmed 25 serrî verê cû tewrê PKKyî bibi. Dima ma cira xeberêke nêgirewte. Wexto ke ma cenazaya ci kişta rayîrî de dîye dejê ma bi di qat. Domanê ma mirenê la reyna înan rê ezîyet yeno kerdene. Ê çend hêrişê cenazayanê ma bikerê ma zî hende wayîrê înan vejîyenê. Ma wazenê ke hînî no îşkence biqedîyo.” STENBOL
