Medya Çinar ku li Girtîgeha Tîpa E ya Mêrdînê li dijî tecrîdê çalakiyeke fedaî pêk anî, di bin dorpêça leşkeran de li gundê Margîkê ya Qosera Mêrdînê hat definkirin
Cenazeya Medya Çinar ku li Girtîgeha Tîpa E ya Mêrdînê li dijî tecrîda li ser Rêberê Gelê Kurd Abdullah Ocalan çalakiyeke fedaî pêk anî, ji aliyê malbata wê ve ji morga Nexweşxaneya Dewletê ya Mêrdînê hat girtin. Malbatê cenazeyê di bin dorpêça wezayîtên zirxî birin gundê Margîkê ya Qosera Mêrdînê û leşker nehiştin tu wesayît bi cenazeyê re biçe gund. Jixwe beriya hatine cenazeyê rêya gund ji aliyê leşkeran ve hat girtin û dorpêçkirin. Her wiha parlamenterên HDP’ê jî di nav de welatiyên ku xwestin tev li merasima cenazeyê bibin ji aliyê leşkeran ve hatin astengkirin.
Leşker bi hinceta fermana walîtiya Mêrdînê nehiştin parlamenter û welatî tev li definkirina cenazeyê bibin. Parlamenterên ku xwestin biryara walîtiyê bibînin, leşkeran diyar kirin ku niha nikarin nîşanî wan bidin û gotin ku destûrê nadin ku derbasî gund bibin. Piştî vê yekî di navber parlamenter û leşkeran de nîqaş derketin û li ser vê yekê vê carê leşkeran îdia kirin ku malbat naxwaze kes tev li merasîma cenazeyê bibin.
Di navbera nîqaşan de leşkeran bi gotina ‘Dewlet qedexe danî. Em dewletên’ û parlamenteran bi ‘provakasyonê’ sûcdar kirin. Li ser vê yekê parlamenteran bi gotina ‘hûn terorîstên bi çek in’ bertek nîşanî leşkeran dan.
Cenaze hat definkirin
Piştî van nîqaşan, bi sedan kesên hatin gund li têketina gund sekinîn. Cenaze li goristana gund hat definkirin. MÊRDÎN
