Cenazeyê gerîlayê HPG’ê Mahmût Alinbay li navçeya Pîranê bi girseyî û bi dirûşman hate veşartin. Hat zanîn ku qeymeqamtiya navçeyê mizgefta ku dê şîn lê bihata dayîn, girtiye
Gerîlayê HPG’ê Mahmût Alinbay (Adnan Pîro) di 22-23’yê hezîrana îsal de li Dêrsimê di encama pevçûna di navbera hêzên gerîla û artêşa tirk de jiyana xwe ji dest da. Cenazeyê Alinbay derbasî Morga Saziya Tipa Edlî ya Meletiyê hate kirin.
Li ser bihîstina bûyerê jî malbata Alinbay çû Meletiyê û cenazeyê kurê xwe teşhîs kir. Malbatê piştre jî cenazeyê Alinbay wergirtin û bi rêyên bejahiyê derbasî navçeya Pîran a Amedê bûn. Dema ku konvoya cenazeyê ketî navçeyê, ji hêla gelek kesan ve bi dirûşm û tililiyan hate pêşwazîkirin. Di merasîma cenazeyê Alinbay de tevî malbata wî, parlamentera Partiya Demokratîk a Gelan (HDP) a Amedê Remziye Tosun û bi sedan welatî amade bûn.
Girseyê cenazeyê Alinbay di bin dorpêça polîsan de derbasî goristanê kir. Goristan ji hêla polîsan ve hate dorpêçkirin. Di merasîmê de girseyê dirûşm berz kirin. Li ser vê yekê jî polîsan gefa mudaxalekirina merasîma cenazeyê kir. Cenazeyê gerîlayê HPG’ê Alinbay bi dirûşm û tililiyan hate veşartin.
Hat zanîn ku mizgefta li navçeyê ku dê şîn lê bihata dayîn, li ser fermana qeymeqamtiya navçeyê hatiye girtin. AMED
