Ji leşkerên ku di êrîşên dagirkeriyê de li Başûrê Kurdistanê hatin kuştin, cenazeyên 17 ji wan anîn Colemêrgê.
Wezareta Parastinê ya tirk di daxuyaniyên 25 û 26’ê mijdarê de tenê li kuştina 5 leşkeran mikur hatibû. Wezaretê her wiha îdîa kiribû ku 3 cerdevan jî ji ber birûskê birîndar bûne û yek ji wan piştre miriye.
Lê belê li gorî nûçeya Ajansa Nûçeyan a Mezopotamyayê, rojên dawî herî kêm 17 cenaze anîn nexweşxaneyên li Colemêrgê û navçeyên wê.
Hat ragihandin ku cenazeyên hin leşkeran jî ji balafirgeha Geverê bi balafirên kargo ji bajarên cuda re hatine şandin.
Li gorî agahiyan, herî kêm 11 leşker û cerdevanên di şer de birîndar bûn li Çelê li Nexweşxaneya Sahra ya Serê Sêvê û li Nexweşxaneya Dewletê ya Şemzînanê ne.
Hat ragihandin ku cerdevanek û 3 leşkerên bi giranî birîndar bûne jî birine Nexweşxaneya Lêkolîn û Perwerdeyê ya Wanê.
Her wiha tê gotin, leşkerên payebilind ên li qereqol û baregehên leşkerî yên li ser sînor dest danîne ser telefonên dîjîtal.
Li gund û deverên nêzî qada şer, ji doh êvarê ve elektrîk hatiye birîn. Her wiha înternet jî giran bûye.
