Komên çete yên DAIŞ’ê li Nîjeryayê êrîşî konvoyeke alîkariya mirovî kir. Di encama êrîşê de 10 kes hatin qetilkirin
Komên çete yên DAIŞ’ê li Nîjeryayê êrîşî konvoyeke alîkariya mirovî ku ber bi herêma Maîdugurî ya Eyaleta Bornoyê ve diçû, kir. Li gorî agahiyên ji çavkaniyên herêmê, komên çete ji ewil konvoy sekinandin û piştre jî endamên koma milîs a bi navê Cîvîlîan Joînt Task Force (CJFT) û hin xiristiyanan ji konvoyê veqetandin. Komên çete piştre jî komkujî pêk anîn û 10 kes qetil kirin.
Tê gotin ku di nava kesên ji aliyê çeteyan ve hatin qetilkirin herî kêm 4 xebatkarên alîkariya mirovî hene. Li gorî agahiyan, çeteyan kincê leşkerî li xwe kirin û di 22’yê kanûnê de komkujî pêk anîn. Tê texmînkirin ku komkujî ji aliyê Boko Haram an jî Dewleta Îslamî ya Efrîqaya Rojava ya ser bi DAÎŞ’ê (ISWAP) ve hatibe kirin.
Koma çete ya ISWAP’ê piştre daxuyaniyek da û ragihand ku di berdêla kuştina serçete Ebûbekir El Bexdadî de 11 xiristiyanên li Bornoyê revandin û înfaz kirin. ABÛJA
