Şerê di navbera şervanên HSD’ê û çeteyên DAIŞ’ê de berdewam e. Şervanên ku derbên mirinê li çeteyan didin, çeteyan neçar dihêlin ku teslîm bibin. Hat zanîn ku îro jî bi sedan çeteyan xwe radestî şervanan kir
Operasyona ku şervanên Hêzên Sûriyeya Demokratîk (HSD) di çarçoveya Qonaxa Şerê Tunekirina Terorê ya Pêngava Bagera Cizîrê de ji bo rizgarkirina gundê Baxoz ê Hecîn a Dêrazorê daye destpêkirin, didome. Çeteyên ku serweriya xwe ya li tevahiya herêmê winda kirin û tenê li çend metreyên Baxozê asê mane, ji destê şervanan derbên giran dixwin.
Hat zanîn ku çeteyên DAIŞ’ê yên ku derbên mirinê dixwin, xwe radestî şervanên HSD’ê dikin. Li gorî nûçeya Ajansa Nûçeyan a Hawarê (ANHA) îro jî bi sedan çeteyên DAIŞ’ê xwe radestî şervanên HSD’ê kir.
Çavkaniyên ji herêmê ragihand ku çeteyên êdî fêm kirin ku nikarin şer bikin, kom bi kom teslîmî şervanan dibin. Çavkaniyan diyar kir ku li gundê Baxozê di van kêliyan de di navbera şervanên HSD’ê û çeteyên DAIŞ’ê de şerekî dijwar rû dide. DÊRAZOR
