Şaristanê Hamburgî yê Almanya de çewlîgijanê welatperweran Înîsîyatîfê Paştdayîşê bi Namzedanê Çewlîgî yê DEM Partî awan kerdbî.
Înîsîyatîf bi eşkerayîyêke venga pêro çewlîgijanê ke welat û teberê welatî de yê, da ke wa weçînayîşanê herêmîyan ê 31ê adare de paştî bidê namzedanê DEM Partî.
Înîsîyatîfî eşkerayîya xo de da zanayene ke 20 serrî yo AKP Çewlîgî seke çewlikê ci yo îdare keno, şaristanî rê xizmet nêkeno û îmkananê şaredarîye terefgîranê xo pêşkêş keno. Eşkerayîye de bale ameye antene ser ke şaristan de wextê peyênî de mîyanê ciwanan de hûmara xokiştişî û koçkerdişî zêdîyaya û wina ame vatene: ”Çunke hêvîyê ciwanan çin ê.”
Înîsîyatîfî vat: ”Ganî pêro welatperwerî xebatanê weçînayîşan de înîsîyatîf bigêrê, erkanê xo bîyarê ca û bixebitê. Êyê ke eşkenê şorê Çewlîgî wa nika şorê la êyê ke nêeşkenê bi telefon û înternetî merdim, nas û dostanê xo seba DEM Partî îqna bikerê. No yew erkê welatperwerîye yo.” HAMBURG
