Çewlîg de tewr peyêne hûmara nêweşanê Vîrusê Korona 14 bîye. Şaristan de hûmara nêweşan kêmîyaye bîye 12 ke înan ra 4 kesî Nêweşxaneyê Dewlete yê Çewlîgî û 8 kesî zî Nêweşxaneyê Cinîyan û Domanan ê Çewlîgî de yenê weşkerdene. Dîya zanayene ke şaristan de servîsê ciewnîyayîşê giranî de nêweş/e çin o/a.
Çewlîg de 4 kesan de semptomê vîrusî dîyayî û nê kesî nêweşxane de gêrîyayî binê îzolasyonî. Vizêr mêrikêkê 80 serreyî Vîrusê Korona ra dinyaya xo bedilnaye. Bi nê hawayî şaristan de heta nika 4 kesî Vîrusê Korona ra merdî ke înan ra 3 tenî camêrd bîyî û yew tene zî cinîye bîye. Ama parekerdene ke nê 4 kesî zî 65 serran ra pîlêr bîyî û tede nêweşîyê kronîkî estbî.
Şaristan de tewr zaf qezaya Bongilan de waqayê vîrusê Korona estê. Bongilan de hewteyê verênî de 31 testî ameyî kerdene. Şaristan de zî heta nika bi temamî 1100 kesan rê testê Korona ame kerdene. Bongilan de nika 102 kesî keyeyê xo de karantîna de yê. Ame parekerdene ke qeza de temasê vîrusê Korona gêrîya binê kontrolî. ÇEWLÎG
