Rêxistinanê Partîya Demokratîke ya Şaran (HDP) yê Çewlîg û Dêrsimî vera destbendkerdişê endamanê Partîya Sosyalîstanê Bindeste (ESP) nêrazîbîyayîşê xo mojna.
Çewlîg
Rêxistina HDPyî ya Çewlîgî derheqê destbendkerdişê endamanê ESPyî de eşkerayîyêke kerde. Wekîlê HDPyî yê Çewlîgî Erdal Aydemîrî ke tîya qisey kerd vist vîrî ke vera muxalîfan operasyonî dewam kenê û sere de ê Sedat Şenogluyî destbendkerdişê endamanê ESPyî bêhuqûq ê. Aydemîrî vat: ”Ma nê destbendkerdişan qet qebul nêkenê. Ma paştî danê înanê ke ameyî destbendkerdene.”
Dêrsim
Rêxistina HDPyî ya Dêrsimî kuçeyê Hunerî de derheqê destbendkerdişê endamanê ESPyî de eşkerayîyêke kerde. Eşkerayîye de Hemsereka HDPyî ya Dêrsimî Nurşate Yeşîl qisey kerd û vat: ”Ê vanê qey ma bi destbendkerdişan do qels bibê. AKP seba ke payan ser o bimano muxalîfan destbend keno. Ganî ê kesê ke bi hawayêkê neheq û bêhuqûqî ameyî destbendkerdene, bêrê veradayene. Ma venga hukmatî danê ke destê xo medo muxalîf û şorişgêran.”
Wekîlê HDPyî yê Stenbolî Dilşate Canbaz Kaya zî vat: ”Herinda ke şima vera muxalîf û şorişgêran operasyon kenê kiştoxanê cinîyan bivînê. Gulîstane Doku 248 rojî to ke vînbîyaye ya, aye bivînê. Wa pêro embazê ma cade bêrê veradayene.” DÊRSIM/ÇEWLÎG
