Hemwelatîyê Çewlîgî dîyar kerdî ke şaredarîya AKPyî ti xizmet nêkena û vatî: “15 serrî yo şar xapîyeno. Eke bedilnayîş bibo do xizmet zî bibo. Ma Çewlîg de bedilnayîş wazenî.”
Weçînayîşê herêmî rê 2 rojî mend. Şaredarîya bajarê Çewlîgî 15 serrî yo destê AKPyî de ya, la hema awanîyêka şaredarî daxî çin a. Seba ke awanîya şaredarî bêra viraştene Wezîrîya Pawitişî erdêko 35 hezar metrekare dewrê şaredarî kerde. Seba viraştişê awanî heta Gulanê 2018î bi 40 mîlyon û 7551 lîre îhale dîya şîrketêk. Labelê seba ke erdê awanî hema zî nêameyo teslîmkerdene dest bi viraştişê awanî nêameyo kerdene.
Bajarê Çewlîgî de 7 partî seba weçînayîşê herêmî ke do 31ê Adare de pê bêro namzedan nîşan dayî. Hemwelatîyê Çewlîgî qala namzedê ke ameyî nîşandayîş kerdî. Hemwelatîyan ra Selahattîn Arat, Alî Berîk, Ersan Kiliç, Fûat Kiliç, Zekî Çukuk, Ekremo ke nêwaşt peynameyê xo bido, Faysal Karoba, Ahmet Dîren û Eyûp Kelatî qisey kerdî.
Hemwelatîyî qiseykerdişê xo de wina vatî: “Tema weçînayîş ra heta weçînayîş şar yeno vîrê Tirkîye. Ma wazenê HDP ser bikewo. Wa seba înan bibo dersêk. Wa seba şar bibo xizmet. Her kes betal o. Do heta kamî wext wina dewam bikero? Seba ke ma Tirkîye de cuyenî, ma hîssin î. Eke bedilnayîş bibo do xizmet zî bibo. Heta nika ti xizmetêk nêameyo kerdene. Cok ra ma wazenê HDP ser bikewo. Eke bedilnayîş bibo do heme çî raşt bibo. Namzedê HDPyî yê Çewlîgî merdimê durust î. 15 serrî yo ke AKP tîya rayîr beno. La hema zî awanîyêka şaredarî daxî çin a. Ê samîmî nîyî. 15 serrî yo ke tena şar xapênayî. Ma rayanê xo danî HDPyî. Ma Çewlîg de bedilnayîş wazenî.” ÇEWLÎG
