Fermandara Qerargehê Merkezî ya YJA-Starî Zozan Çewlîk bi wesîleya 8ê Adare Roja Cinîyan ya Dinya ANFyî rê qisey kerd. Qiseykerdişê Zozan Çewlîk ra tay noqtayê girîngî wina yê:
”Her çiqas bi hawayêkê fermîyî nêameyo namekerdene zî nika Şerê Dinya yo Hîrêyîn qewimîyeno. Krîzê sîstemî û nakokîyî vejîyenê werte ke nê heman wextî de îmkananê çareserîye zî pêşkêş kenê. Seserra 21ine sey seserra cinîyan pênase bena. Coka Şerê Dinya yê Hîrêyînî de hêrişê azadîya cinîyan yenê kerdene. Bi taybetî Rojhelatê Mîyanênî de no şer bi destê cergan vera cinîyan yeno kerdene. Îşxalê welatan, hêrişê cergan, metodê şerê taybetî û şîdetî benê sebebê qirkerdişê cinî û domananê kênayan. Şerê Ukrayna-Rûsya, Hamas-Îsraîl, serebûtanê Afganîstanî, şeranê Sûrîye, Iraq, Yemen ûsnç de cinîyî hem yenê qetilkerdene û tecawuzkerdene hem zî erdê xo ra yenê dûrvistene. Ferzkerdişê koçberîye zî polîtîkayêka şerî ya. Êyê ke welatê xo teriknenê teber de benê mexdûrê şerî û sey hacetanê sîyasetî şuxilîyenê.
Raştîya Kurdîstanî de serkêşîya Rayber Apoyî de azadîya cinîyan aver şîye. Coka dewletanê kolonyalîstan hêrişê nasnameyê azadî, Kurdîstanê Azadî û Neteweya Demokratîke kerd. Dişmen bi taybetî embazanê ma yê serkêşan û rêxistinîya cinîyan keno hedef. Hêrişanê îşxalî de hêzê ma yê gerîlayî yenê hedefkerdene. Dişmen nêwazeno ke cinîyê kurdî sîyaset bikerê, xo bipawê, rêxistin bikerê û vejîyê vernî. Kurdîstan de dişmen seba ke têkoşînê cinîyan qels bikero polîtîkayanê şerê taybetî ano ca. Cinîyan ê kurdan rê fuhuş, madeyê tîryakî, ajanîye û hîsê sexteyînî yenê ferzkerdene. Seke Rayber Apoyî vatbi azadîya cinîyan azadîya komelî ya û no çi pratîk de ho qewimîyeno. Dişmen zî raşta raşte hêrişê ney keno. Bi taybetî 2015 ra nata her hetî ra dormeyê cinîyan de hêrişê dişmenî est ê. Dewleta tirke bi polîtîkayanê şerê taybetî kena ke îradeyê cinîyan ê kurdan teslîm bigêra. Teyan Vakur de ney parçayanê bînan de zî rewşa cinîyan ê kurdan wina ya. Dişmenî rê mesele teyna cinîya kurde nîya; mesele averşîyayîşê têkoşînê azadîya cinîyan o.
Estbîyayîşê têgêrayîşê azadîya cinîyan ê Kurdîstanî û têkoşînê ci şanso tewr pîl ê cinîyan û komelî yo. Polîtîkayê şerê taybetî zî ferasetê dişmenîya cinîyan ê serdestîya camêrdan zî bi rêxistinî û hêzanê xopawitişî eşkenê bêrê pûçkerdene. Ganî cinîyî bizanê ke ê kam ê û raştîya camêrd-dewlete çita ya. Hetê bînî ra girîng o ke cinîyî her ca de xo rêxistin bikerê û dormeyê xo zî rêxistin bikerê. Ganî cinîyê ma yê ciwanî dişmenî rê yew bero akerde nêverdê. Kam hêrişê ma bikero ganî ma hesabê ney sey cinîyan bipersê. Xopawitiş heqê ma yo tewr meşrû yo. Ganî cinîyî bi hawayêkê aktîfî waran de bibê. Ganî cinîyî vera tehlukeyanê sey manîpulasyonanê HUDA-PARî û kerdişanê PDKyî bi rolê xo yê serkêşîye komelî werizno payan ser. Ganî cinîyî bi xo tedbîranê xo bigêrê.
YJA-Star wayîrê tecrubeyanê rêxistinî û têkoşînî yo, artêşa radîkale ya azadîya cinîyan o û tim bi ferasetê mesuldarî têgêreno. Yanî YJA-Star hem hezo îdeolojîk û sîyasî hem zî hêzo leşkerî yo. Gerîlayê YJA-Starî goreyê şertan û taktîkanê xo yê newebîyayeyan tim xo aver benê û bê tersî danê dişmenî ro. YJA-Star ewro pêro dinya de serkêşîya cinîyan keno. Hêzê ma yê YJA-Starî her ca de eşkenê bidê dişmenî ro û heqê zehmetîyan ra bêrê. YJA-Starî milîtanê Apogîrî yê û seba heqanê cinîyan têkoşîn kenê. Ma do sey hêzanê YJA-Starî tim do temsîlkarîya îradeyê cinîyan bikerê û Şerê Dinya yê Hîrêyînî de bibê hêzê serkewtişî.
Hêzê YJA-Starî yo tewr pîl nasnameyê ci yo îdeolojîk o. No nasname de paradîgmaya Neteweya Demokratîke û Îdeolojîya Azadîya Cinîyan ra yeno pê. Çimeyê YJA-Starî felsefeya Rayber Apoyî ya. Dima zî YJA-Star rêxistina pawitişê cinîyan a. YJA-Starî goreyê stratejîya Şerê Şarî yê Şorişgêrî û bi taktîkanê gerîlatîya moderne têgêreno. Mîyanê hêzanê ma de hêzê tunelan, hêzê hereketînî, hêzê pisporî est ê ke tewir bi tewirî çalakîyan kenê.
YJA-Starî tecrubeyanê şehîdanê sey Sakîne Cansiz, Azîme, Besê Anuş, Rahîme Kahraman, Azîme Demîrtaş ser o ronîya. YJA Star şenso tewr pîl ê seserra 21ine yo. Çunke ewro eke dinya de ferasetê azadîya cinîyan aver şîyo ney de bara YJA-Starî zaf a. Hêzê YJA-Starî seba ronayîşê kokanê xopawitişî yê têkoşînê cinîyan ê herêmîyî bi mîsyonê serkêşîye têgêrenê. Ewro pêro dinya de cinîyî têkoşînê YJA-Starî ra îlham gênê.
Ma sey hêzanê YJA-Starî 2024 de warê azadîya cinîyan de têkoşîn bikerê. A raşte merkezê Şerê Dinya yê Hîrêyînî Îmrali de yo. Her çî ra ver ma do tim bi erkê xo yê serêkîye têbigêrê, tim derbanê giranan bidê dişmenî ro û azadîya Rayber Apoyî qetîyen bîyarê ca. 2024 de ma do qirkerdişê cinîyan vindarnê û verê polîtîkayanê şerê taybetî bigêrê. Ma bi nê armancan û ferasetî verê xo danê 8ê Adare. YJA-Starî amade yo û hayîya ci bi mesuldarîyanê xo est a.
Ganî ma sey cinîyan her roje bikerê 8ê Adare. 8ê Adare serrgêra îhtîyacê azadîya cinîyan a. Ganî ma na 8ê Adare de têkoşînê xo biresnê asta globale. Ganî ma xorêxistinkerdişî rê bi israrî dewam bikerê, qirker û tecawuzkeran ra hesab bipersê û tewirê xo yê têkoşînî bi zelalî bimojnê. Ganî ma yewîya xo awan bikerê û verê cepheyê serdestîya camêrdan yew cephe de, pîya şer bikerê.
Şer Rojhelatê Mîyanênî û Kurdîstan de xorinêr beno. La seke Rayber Apoyî vatbi ‘Cinîyî do dinya bixelisnê.’ Ganî ma nê qiseyî de erk û mesuldarîyanê xo bivînê. Qet yew hêz nêeşkeno qerardarîya ma bişikno. Qîrayîşê serkewtişî yo ke Zapî ra berz beno vengê ma yê azadîye yo. Ez 8ê Adare sere de embazanê ma yê zîndanan û gerîlayan, dadîyanê ma rê pêro cinîyan rê fîraz kena û her yewe rê serkewtiş wazena. Ma na 8ê Adare bi ruh, hişmendî û serkêşîya embaze Sema Yuce pêşwazî kenê. Ma bi hêzê aye koyan û deştan bi merşanê serkewtişî debikerê, bi pîlkerdişê kulturê azadîye komelê xo bipawê û newe ra awan bikerê, komelbîyayîş û azadîya xo biresnê pê û bi hêzê ‘JIN, JIYAN, AZADÎ’ dişmenî çin bikerê.” BEHDÎNAN
