Rewşa domana bi nameyê Avşîna ke tewrê dayîka xo zîndan de manena her roje hîna xirab bena. Cezaya dîsîplînî ke dîyabî dayîka Avşîne Hulya Usanmaza ke nêşkena kênaya xo rê derman bigîra ameye wedarnayene
Hulya Usanmaze Artuklu ya Mêrdînî de cuyayêne. Seba ke 6 serr û 7 aşmî cezaya zîndanî dîya Usanmaze tewrê domana xo ya şenik ya bi nameyê Avşîna ke nêweşîya Hemanjîom (tumorê damaran) kewte zîndan. Her çiqas ke bedenê Avşîne roj bir oje bihelîyo zî rayîrberîya zîndanî derheqê dayîka aye de tehqîqat dabî destpêkerdene. Roniştişê doza ke çarçeweya tehqîqatî de ameybî akerdene rojanê verênan de ame vînayene.
Rojanê verênan de wexto ke Avşîne derenceyanê zîndanî ra kewena erd û dayîka aye benî nêweşxane, Hulya vana ke ‘Bi destanê kelemçekerde ez do senî biewna domana xo’ û rewşe rê îtîraz kena. No hedîse de derheqê Hulya Usanmaze de zabitname yeno tepiştene, tehqîqat dîyeno akerdene û cezaya dîsîplînî aye rê yena birayene.
‘Ez do kesê ke zabitname hadre kerdî gerre bikera’
Roniştişê yewin yê doza ke çarçeweya hedîse de derheqê Usanmaze de ameybî akerdene rojanê verênan de Mehkemaya Înfazî ya Mêrdînî de ame vînayene. Usanmaze bi rayîrê SGBSyî tewrê roniştişî bîye. Usanmaze va: “Ez waştişnameyo ke mi dayo dibare kena. Heqê tu kesî çin o ke dayîkbîyayîşê mi cigêrayîş bikero. Kênaya mi nêweş a û sereyêa aye de tumor esto. Ez wazena ke rewşe verê çiman de bêra girewtene û cezaya dîsîplînî ke mi rê ameyebî birnayene bêra wedartene. Ez do kesê ke zabitname hadre kerdî gerre bikera.”
Netîceyê îfadedayîşî de mehkema lazimî bi muhakemekerdişî nêvînaye û cezaya dîsîplînî ke hetê rayîrberîya zîndanî ra dîyabî Usanmaze wedarnaye. MÊRDÎN
