Mehmet Yildirimo ke birayê Medenî Yildirimo ke 18 serrîya xo de 28ê hezîrana 2013î de dewa Hêzanî ya qezaya Licê ya Amedî de protestoyê vera viraştişê qaleqolan de bi guleyê leşkerî cuya xo vînî kerdbî, bi mehneya ‘heqaret bi Erdoganî kerdo’ serr û 2 aşme û 7 roje cezaya zîndanî ci rê ame birnayîşe. Yildirimî vera no qerarî de muracatê Mehkemeya Qanûno Bingeyî (AYM) kerd.
Nê hirê parekerdişanê “Fikrê Erdoganî nizdîyê DAIŞî yo”, “Kiştox, diz” û “Bi raştî zî qey ti qaz î” medyaya komelkî yê Mehmet Yildirimî ke hesabê xo yê “@yildirim_medeni” de pare kerdbî vera Mehkemaya Cezaya Aslî ya 4. ya Amedî de bi bahaneya ‘heqaret bi Erdoganî kerdo’ derheqê Mehmet Yildirimî de dewaye ameybî akerdiş. Bi bahaneya nê vatişê ke ameyî xebetnayîş seba rencîdekerdişê haysîyet û ercê Serekkomarê AKPyî Erdoganî vajîyayî, serr û 2 aşme û 7 roje ceza Yildirimî rê ame birnayîş.
Avukatê keyeyê Yildirimî Serdar Çelebî zî 14ê hezîrane de dosya Mehkemaya Cezaya Girane ya 9. ya Amedî rê şirawit. Mehkemaya Cezaya Girane zî qerar dabî ke qeraro ke ameyo dayîş de tu bêusulî çinî yo û muracat red kerde.
Muracato ke AYMyî rê ame şirawitiş de nuqtaya azadîya fikrî yê ke Pêkerdişê Heqê Merdiman yê Ewropa (PHME) û qerarê binpaykerdişî yê Mehkemaya Heqê Merdiman ya Ewropa (MHME) yê na babete ameyî vîrardene. AMED
