Xoverdayoxanê rojeyê mergî ra Zozan Çîçeke va: “Ma do bi qerardarîye xoverdayîşê xo bidomnê. Ma soz dayo Kemalan û Xeyrîyan. Netîce çi beno wa bibo, do serkewtiş yê ma bo.”
Hemverê tecrîdkerdişê Rayberê Şarê Kurdî Abdullah Ocalanî de 15 tepişteyanê dewaya PKK û PAJKî 30ê Nîsane ra nata rojeyê mergî de yê. Çalakwananê rojeyê mergî ra yewe zî Zozan Çîçek a ke Zîndanê Bakirkoyî yê Cinîyan ê Girewteyî de manena. Çîçeke bi rayîrê avûkata xo Ayşe Acînîklî ajansê ma rê peamêk şirawit.
Peyamê Çîçeke de wina yeno vatene:
“Grevê vêşanîye yê bi şîarê ‘Ma tecrîdî bişiknê, faşîzmî birijnê û Kurdistanî azad bikerê’ roje bi roje hîna benê pîl. Tecrîdo ke 20 serrî ra vêşêr o Îmrali de yeno bicaardene sûcêkê merdimîye yo û hetê ci yo huqûqî çino. Hukmatê AKPyî yê faşîstî heta nika gamêk nêeşta û xo ker kerdo. Hemverê naye de ma ramot ke ma qerardar ê û seba wedartişê tecrîdî ma dest bi rojeyê mergî kerd. Ê çende biwazê xoverdayîşî peygoş bikerê zî, rind zanê ke demokrasî û çareserî ancax bi Rayber Apoyî yena serê nê erdî.
Heta ke waştişê ma yê heqdarî û meşrûyî nêrê bicaardene, ma do dest na çalakîya xo ra vera nêdê. Senî ke zîndanê Amedî de 82 de embaz Kemal, Xeyrî, Akîf û Alîyî beyraqa xoverdayîşî kerde berz, sey peyrewanê înan ma do zî bi na çalakîya xo rayberê xo azad bikerê. Bedelê ci çi beno wa bibo ma do xoverdayîşî hîna bikerê pîl. Vengdayîşê ma şarê ma rê zî na çarçewaye de yo.
Ganî hîna zaf çalakîya mayan rê wayîr bêro vetene
Êyê ke nika reyna xover danê mayê ma yê. Ganî hîna zaf wayîr çalakîya mayan rê bêro vetene û her kes wareyo ke tede yo bikero wareyê serewedartişî. Kam xo ra vano ‘ez demokrat a, sosyalist a’ ganî vejîyo meydanan. Çîyo muhîm zî oyo ke ganî her keso ke wayîrê wijdanî yo goş bido vengê zîndanan. Heta ke ma bi hawayêkê topyekunî sere nêdarê we ma do nêeşkê netîce bigêrê. Tênêgêrayîş beno sebebê mergî. Seke Kemal zî vano, faşîzm tewr zaf veng û roşnayîye ra terseno. Ma zî qerardar û bawer ê ke bi veng û çalakîya xo ma do faşîzmî bin fînê. Loma ma soz dayo Kemal, Xeyrîyan. Netîce çi beno wa bibo, do serkewtiş yê ma bo.”
15 tepişteyê ke rojeyê mergî de yê:
Zîndanê Bakirkoyî yê Cinîyan de: Nesrîn Akgule, Şukran Aydine, Zozan Çîçeke.
Zîndanê Gebze yê Cinîyan de: Ardil Çeşme, Asli Dogane.
Zîndanê Wanî yê bi Asayîşê Berzî de: Ahmet Anigi, Ozhan Ceyhan, Vedat Ozagar, Îhsan Bûlût, Erol Çelîk.
Zîndanê Amedî yê Tîpa Dyî de: Engîn Akhan, Enver Durmaz, Ahmet Topkaya, A. Haluk Kaplan, Ferhat Tûrgay. STENBOL
