Qezaya Sarayî ya Wanî de 4ê sibate vewrês ginabi mînîbusêke û wesayîtêkê karî ser. Hedîse de 5 kesî merdbi, 6 kesî birîndar bibî û 2 kesî zî binê vewre de mendbi. Wexto ke tîmê xelisnayîşî û hemwelatijî cigêrayîşê xelisnayîşî kerdêne vewrêso diyîne gina înan ser. Vewrêso diyîne de nizdîyê 50 kesî binê vewre de mendî. Netîceyê cigêrayîşan de heta nika cenazeyê 38 kesan binê vewre ra ameyî vetene. Hedîse de zêdeyê 100 kesî zî birîndar bîyî.
Goreyê eşkerayîya Serekîya Îdarekarê Rewşa Lezgînî û Afetî (AFAD) qezaya Sarayî ya Wanî de hûmara kesê ke binê vewrêsî de mendî û cuya xo vindî kerdî resaya 38 kesî û 100 kesî zî bi hawayo birîndar binê vewre ra ameyî vetene û wedarîyayî nêweşxaneyan. Ame zanayene ke yewîyê xelisnayîşî ke şewa verên maben dabî cigêrayîşan, serê sibayî reyna xebatanê xelisnayîşî dayî destpêkerdene. Yewîyê xelisnayîşî saetanê serê sibayî de dest bi kinitişê vewre kerdî. Hema zî nîno zanayene ke çend kesî binê vewre de mendî. Wezîrê Karê Zerre yê AKPyî Suleyman Soylu îdîa kerd ke hûmara kesê ke binê vewre de mendî 3 kesî yî. Wezîrê Weşî Fahrettin Koca zî dîyar kerd ke heta nika 6ê înan giran pêropîya 75 birîndarî nêweşxaneyan de estî. WAN
