Merkezê Xeberan]
Nêweşîya Vîrusê Korona ke bajarê Çînî yê Wuhanî ra vejîya û heta nika vilayê 27 welatanê bînan bîye, her ke şona vila bena. Goreyê dayeyanê peynî Çîn de hûmara kesê ke nêweşîya Vîrusê Korona (2019-nCoV) ra cuya xo vindî kerdî vejîyaye hezar û 18 kesan. Goreyê eşkerayîya Komîsyona Weşîye ya Neteweyî ya Çînî Vîrusê Korona ra 89 kesê bînî merdî. Vîşêrê Çînî, Hong Kong de yewêk û Fîlîpînî de zî 2 kesî vîrusê korona ra merdî. Bi nê hawayî hûmara merdimanê ke Vîrusê Korona ra merdî hûmara kesanê ke vîrusê Srasî ra merdî ra bîye zêdêr ke mabênê serranê 2002-2003î de pêro dinya de 774 kesî vîrusê Srasî ra merdbî.
Vîrus dinya de beno vila. Dormeyê 30 welat û herêman de tewr tay 320 kesî vîrusî ra kewtî. Fransa de 8ê sibate de roja şemeyî panc kesanê bînan de vîrusê Korona ame tesbîtkerdene. Nê pêro zî hemwelatîyê Îngîlîztanî yê ke 4ê înan pîl ê û yew zî doman o. Fransa de hûmara kesanê ke vîrusê Korona ra kewtî 11 a.
Goreyê dayeyanê tewr peynî yê Rêxistina Weşî a Dinya û Komîteya Weşî a Çînî hûmara kesê ke bi Vîrusê Korona ra tesîr bîyî zî resaya 43 hezar û 102 kesan.
Goreyê dayeyanê Rêxistina Weşî a Dinya û Komîteya Weşî a Çînî 4 hezar û 43 kesê ke vîrus ra tesîr bibî zî baş bîyî û rewşa weşîya înan baş a. Ame zanayeneke Vîyetnamî de zî 15 kesi vîrus ra tesîr bîyî û bîya 15 û mîyanê înan de domanêko 3 serre zî esto.
