Cinîya Murat Kayayî Zozane Mihyeddîn dîyar kerde ke aye 7 rojî nezaret de mende û polîsan aye tehdît kerdî ke ê do aye bierşawê Sûrîye. Mihyeddîne va: “DAIŞ Kobanê de babîyê mi, dewleta tirkî zî mêrdeyê mi kişt.”
Murat Kaya dewa Mûşîyanî ya Tutaxî ya Agirî de 6ê kanûne de sereştişanê keyeyan de hetê leşkeranê tirkî ra amebi kiştene. Cinîya ci Zozane Mihyeddîn Ajansê Xeberan ê Mezopotamya (MA) rê derheqê serebûtî û qewimîyayîşnê badê ci de qisey kerd.
Mihyeddîne îfade kerd ke 7 rojan sey destbendkerde mende û leşkeran ci gef rê wend ke ê aye do bierşawê Sûrîye. Mihyeddîne va: “Qetilkerdişê Muratî ra dima leşkerî ameyî keye de cigêrayîş kerd. Înan ez destbend kerda û berda Qeraqolê Cendirmeyan ê Tutaxî. Mi rê va ke mêrdeyê to merd, la mi bawer nêkerd. Vat mêrdeyê to terorîst o bomba eşt ma ser, ma reyde pêkewtiş kerd. Mi înan rê va keyeyê ma de çekêk çin a. Mi reyde 4 cinîyê bînî zî ameybî destbendkerdene. Nezarat de ma rê heqaret kerdêne. Nan nêdayêne ma. Îfade de leşkerî mi rê persayî va ‘Ti çira ameya?’ Mi va Kobanê de şer estbî coka ameya. Wexto ke ez şîyêne îfadedayîş mi dewîjê bînî dîyî. Rîyê înan mor bîyî, nêeşkayêne rayîrî ra şorê. Leşkeran mi rê va ‘Eke ti kesêk rê behsê na mesele bikî ma do to bierşawê Sûrîye’. Bi israrê keyeyê Muratî destûr da ke ez tewrê definkerdişê mêrdeyê xo biba. Defin ra verî derzîn daye mi ro. Di polîsî kewtî kiştê mi û mi rê va ‘çew de qisey meke, meqîre.’
DAIŞ Kobanê de babîyê min o bêgune kişt. Dewleta tirke zî mêrdeyê mi kişt. Yew sucê mêrdeyê mi çinbi. Ameyî keyeyê mi serûbin kerd. Domanê mi bêbabî mendî. Ez şora ça, kam ra çi biwaza? Yew têkilîya mêrdeyê mi bi kesêkî çinêbî. ” AGIRÎ
