Mehkemeya tirkan bi zorî kerd ke Aysel Tugluka ke nêweşa demansî ya, bi rayîrê SEGBÎSî Dewaya Kobanê de pawitişê xo bikera. Koma Kampanyaya ‘Semedê Tugluke 1000 Cinîyî’ vera mehkemeya ke pê zorî Tugluke ra pawitiş waştbi, nêrazîbîyayîşê xo mojna.
Tugluk kişta ci de avûkata ci, pê SEGBÎSî tewra mehkeme bîye la nêeşkaye qisey bikera û xo îfade bikera.
Koma Kampanyaya ‘Semedê Tugluke 1000 Cinîyî’ vist vîrî ke Tugluke mehkeme de israrê serekê mehkeme ser o vato ”Rewşa min a taybete est a, ez nêeşkena îfade bida, ez nêweş a. Nêweşîye ra ez dima pawitişê xo bikera.”
Eşkerayîya kome de bale ameye antene ser ke rewşa Tugluke vera bena giranêr û eke çîyêk bêro sereyê aye mesuldarê ci Serekîya Edaletî û pêro selahîyetdarê îdarî û edlîyî yê. Eşkerayîye de venga pêro selahîyetdaran ame dayene ke wa Tugluke cade vera bidê. Kome vat: ”Ma 56 welatan ra 6 hezar cinîyî reyna vanê ke ma seba Tugluke û pêro tepişteyanê nêweşan azadîye wazenê.”
