Tepişteyê sîyasî yê zîndanê Kurdistan û Tirkiyîya 27ê Teşrîna Peyêne ya 2023yî de bi waştişê “Abdullah Ocalanî rê azadî, problemê kurdî rê çareserîya sîyasî” çalakîya grevê vêşanîye dayî destpêkerdiş. Bi eynî waştişî keyeyê tepişteyan zî 4ê Kanûna 2023yî de Amed û dima ra 6 bajarê bînan de çalakîya Nobeta Edaletî dayî destpêkerdiş. Her çend ke hîri aşmî ra zêde derbaz bibo zî seba waştişê tepişteyan game nêameyo eştiş.
Cinîyê qezaya DEPî ya Xarpêtî veng kerdî ke ganî her kes bibo vengê çalakîyê grevê vêşanîye ke zîndanan de dewam keno.
‘Wa ê zî bikewê grev’
Cinîya bi nameyê Remzîyeye da zanayîş ke tepişte seba azadîya fîzîkî ya Abdullah Ocalanî û binpaykerdişê heqan kewtî grevê vêşanîye û wina dewam kerd: “Ez ji înan rê serkewtiş wazena. Serê înan de teda est o. Înan kenê hucreyê yew kesî. Ê seba welatê xo û seba îradeyê şarê xo kewtî grev. Tepişte vera tecrîdî de xover danê. Keye zî teber de dest bi Nobeta Edaletî kerdî. Ma paştîdayîş dane înan. Ma seba Selahattîn Demîrtaş, Gultan Kişanak û Fîgen Yuksekdage edalet wazenê. Ma înan pey de yê. Wa şarê ma wirzo serê payan û bêveng nêmano. Wa xoverdayîş pîl bibo û Serekê ma azad bibo. Ma do fek dewaya xo ra vera nêdê.”
‘Ganî ma bibê vengê înan’
Zuhal Erdogan Kaya zî venga heme kesî kerd ke paştîdayîş bidê grevê vêşanîye û wina vat: “Tepişteyan nêbenê nêweşxane. Tepişteyê ke grev de yê nêeşkenê xo biresnê heqê weşîye. Hîrê aşmî yo grev de yê. Waştişê înan nînê ca. Bi keyeyê xo reyde nêeşkenê pêvînayîş bikerê. Ganî ma bi lezkî seba tepişteyan dest bi têkoşînî bikerê. Cigêrayîşê zitî cinîyan rê ferz kenê. Tepişteyî şertê giran de yê. Seba ke înan tena biverdê tîpê S û Yyî zêde benê. Coka ra ganî ma paştîdayîşê xo pîl bikerê û ma bibî vengê tepişteyan.”
Nargul Baydare zî eynî çîyan reyna kerd û wina ercnayîşê xo ard ziwan: “Tepişteyan surgunê bajarê dûrî kenê. Coka ra keye nêeşkenê şêrî pêvînayîşan. 15 rojan ra reyêk heqê pêvînayîşê telefonî danê. Zîndanê Tîpê S û Yyî zêde kerdî. Keyeyî wextê ke şinê pêvînayîşan cigêrayîş giran kenê. Cigêrayîşê zitî ferz kenê. Ganî şarê ma zî bikewo grevê vêşanîye. O wext do waştişê tepişteyan bêrê ca.”
‘Çi destê ma ra bêro ma do bikerê’
Tulay Aydine zî derheqê binpaykerdişê heqan yê zîndanan de nê ercnayîşan kerd: “Ma keyeyê tepişteyan ra eşnawenê. Tepişteyî zîndanan de zehmetîyan ancenê. Seba ke tepişteyan keyeyê înan ra dûrî bikerê surgunê bajarê dûrî kenê. Keyeyî coka ra nêeşkenê tutanê xo bivînê. Demêk derg nêeşkenê şêrê pêvînayîşan. Ma nê tecrîdî şermezar kenê. Heqê tepişteyan yeno xespkerdiş. Çi destê ma ra yeno ganî ma bikerê. Ganî ma bêveng nêmanê. Ma paştîdayîşê xo nîşan bidê.”
