Xebatê cigêrayîşî yê seba wendekara Zanîngehê Munzurî Gulîstane Doku ya ke 34 roj ê ke vîndîbîyaye ya dewam kenê la hema zî Gulîstane ra xeberêke çin a. Tîmê cigêrayîşî îdîa kenê ke Gulîstane awbend de nîya. Tîmanê cendirmeyan û polîsan raporêk amade kerd ke Gulîstane awbend de nîya û xebatê cigêrayîşî vindarnayî. Tehqîqatê serdozgerîye de zî gamêke aver nêameye eştene.
Cinîyê Dêrsimî hema zî persenê vanê ke ‘Gulîstane kotî de ya?’
Hemsereka HDPyî ya Dêrsimî Ozleme Toprak vat: ”Dêrsim de hayîya selahîyetdaran pê her çîyî esta la Gulîstane nêvînenê. Mengêke ra nata her cayê Tirkîya ra tîmî ameyî Pirdê Dînarî de gêrenê Gulîstane. La pêro vanê ke Gulîstane uca de nîya. Ma do teqîbkerdoxê na dewa bibê.”
Her ca de kamerayî estê
Endama Meclîsê Şaredarîya Dêrsimî Nurgule Yalay vat: “Dêrsim cayêko qijkek o. Her ca de kamerayî estê. La nêeşkenê Gulîstane bivînê. Ganî rayaumûmîye rê eşkerayîyêka zelale bêra kerdene. Ma do dewam bikerê persê ke Gulîstane kotî de ya.”
Demografîyê Dêrsimî yeno vurnayene
Endama Partîya Kede (EMEP) Çagla Yolaşan vat: “Tehqîqatê Gulîstane de têna fikrê ‘xokiştişî’ ser o yeno vindertene. Şikê winasênî estbê zî ganî îhtîmalanê bînan ser o zî bêro vindertene. Ganî bêro cigêrayene ke beno ke Gulîstane kişîyaya. Dêrsim de polîtîkaya taybete ya şerî yena kerdene. Tede zaf hêzê dewlete este. Bi nameyê ‘asayîşî’ demografîyê Dêrsimî yeno vurnayene.”
Her roje cinîyê ciwanî vindî benê
Endama Komeleya Paştdayîşê Cinîyan a Yenîgunî ya Dêrsimî Fîdane Demîr vat: “Eke Gulîstane xo kişt ganî awe de biameyêne dîyene. Gulîstane ya ameye remnayene yan zî çîyêko bîn bi. Her roje cinîyê ciwanî vindî benê, domanan rê îstîsmar yeno kerdene. Ma zaf qerqilîyenê.” DÊRSIM
