Elewî seba bawerîya xo xeylêk astengîyan dir yenê rî bi rî. Îqtîdar ke wayîrê ferasetê yewperestî yo, vernîya Elewîyê ke wazenê bawerîya xo biciwîyê, beno asteng. Bi perwerdeyîyê dînî dir rayîrê asîmîlasyonî akenê. Sewbîna keyeyê cemî yê îbadetxaneyê Elewiyan sey îbadetxane qebûl nêkenê û no zî nêzdîbîyayîşê yewperestî yê îqtîdarî ramojneno. Elewîyan hemverê nê caardişî û fatureyê zamî muracatê hukmî kerdî û qeraro ke hukmî ra bêro yeno meraqkerdiş.
Sîbel Kiraz vat, bi serran o Elewî çin yenê hesibnayîş û vat: “Ma wazenê nê caardişî hemverê Elewîyan û dersa dînî ke ferzkerde ya, bêro wedaritiş. Seba ke ma nê qebûl nêkenê ma çin hesibnenê. Demê weçînayîşan de soz danê Elewîyan. Ma nêwazenê keyeyê cemî bibê bazirgaxane. Wa sey îbadetxane qebûl bikerê. Seba fatureyê keyeyê cemî hetê dewlete ra bêrê dayîş ma muracat kerd. La ma nêzanê do qerarêko senîn bêro dayîş.”
‘Ma do destûr nêdê çinkerdişê kulturê Elewîyan’
Kiraze tewr peyîn wina vat: “Tutê mi perwerdeyê dînî yê ferzkerde dîyî. La ma hemverê nê yê. Yê ke vera nê vejîyayî, ardî sewîyeyêka mektebî ra bierzê. Reyna puanê wendekaran vistî. Ma hemverê dersê ferzkerde yê. Ma do her wext hemverê nê bê. Çi beno wa bibo ma fek ci ra vera nêdanê. Ma Elewî yê, ma estê.”
‘Ma têduştî wazenê’
Fîlîz Ozdemîr zî wina vat: “Ganî keyeyê cemî, dêre, camî seyyewbînan bê. Ganî seba heme kesî butçeyêk têduşt bêro visnayîş. Ma wazenê vengê xo bidê eşnawitiş. Ma reaksîyon ramojnenê, la kes ma nêeşnaweno. Wina nêbeno. Ma do vengê xo tewr berz bikerê. Ma do her wext seba aştî û têduştî têkoşîn bikerê. Waştişê ma têduştî yo.”
‘Ganî dîyanet bêro padayîş’
Ozdemîre tewr peyîn wina vat: “Îqtîdar baweriyêk bîn qebûl nêkeno. No welat de yew dîn çin o. Armenî, Suryanî û baweriyê bîn estê. Ganî no bêro vînayîş. Nê welatî de huqûq esto, la ma bi edeletê înan bawer nêkenê. Seba nê bawer nêkena muracatê ma pozîtîf netîce bibo. Ganî diyanet bêro padayîş. Seba têduştî û aştî ganî her kes wayîrê yewbînan bivejîyo.”
‘Wazenê Tirkîyayêke tarî awan bikerê’
Aysel Ozturk zî bale nat serê eynî babete û vat: “Îqtîdaro ke her babete de Elewîyan xo vîr ra keno, la wexto bac gêno xo vîr ra nêkeno. Elewî Tirkîya de sey sinifa diyîn yenê qebûlkerdiş. No ma xemgîn keno. Keyeyê cemî bazirgaxane nîyê. Ma nas nêkenê, o wext çira bacî ma ra gênê. Wazenê Tirkîyayêke tarî awan bikerê. Butçeyê Diyanetî zaf pîl a. Ganî her kes hemverê bawerîyan rêzdar bo. Wa hemverê ma zî rêzdar bê. Tutanê ma rê teda kenê. Do bi no hawa heta ça şêrê.” STENBOL
