Cinîyê êzidî Şengal de bi serkêşîya Têgêrayîşê Azadîya Cinîyanê Êzidîyan (TAJÊ) û Yewîya Cinîyan ê Êzidîyan vera pêkerdişê Hewlêr û Bexdayê de rayîrşîyayîşêk viraştî. Cinîyan ard ziwan ke pêkerdişsey fermanêko newe yo û vatî: “Ê ke îradeya ma nêşinasnenê ma zî îradeya înan nêşinasnenê.”
‘Ê ke reyêk îxanet bikerê do timî îxanet bikerê’
Endama Meclisê Şarî ya Şengalî Neam Bedel qiseykerdişê xo de va: “Ma vera qeraro ke seba Şengalî ameyo dayene de rayîrşîyayîş virazenê. Xebera ma şengalijan no qerarî ra çinî yo. Ma do îxaneto ke ma rê ame kerdene qet xo vîra nêkerê. Hema zî xeylê cinîyê êzidî destê çeteyanê DAIŞî de yê. Ê ke reyêk îxanet bikerê do timî îxanet bikerê. Tena 2014î de ma rê îxanet nêame kerdene. Serra 2017î de bi nameyê Pêşmegeyê Roje ameyî û hêrişê ma kerdî. Ma êdî xayînan erdê xo ser de qebul nêkenê. Heta ke yew doman û dayîkêk ma bimano, ma do xover bidî.”
‘Lazimîya ma bi tu hêzêk bîn çin a’
Endama Weqfê Cinîyanê Êzidî Ferîde Şengalî pêkerdiş şermizar kerde û wina va: “Ma seba cinî û domananê ma yê ke hema destê çeteyanê DAIŞî de yê, na rewşe qebul nêkenê. Ma yewna reye na rayîrberîya ke îxanet bi ma kerde qebul nêkenê. Êdî îradeya ma esta. Hêzê ma yê xopawitişî esto. Ma eşkenê xo rayîr bibî. Lazimîya ma bi tu hêzêk bîn çin a.”
‘Çîyêk nêvatî û remayî’
Dayîka têkoşer Şoreş Şengalî o ke şerê Xanesorî de 2017 de netîceyê şerê bi Pêşmergeryê Rojî de dinyaya xo bedilna, Meyane Nasir wina va: “Qeraro ke ameyo girewtene fermanêk newe yo. Reyna Şengal yeno rotene. Êdî bes o, wa nêvajê ma agêrenê Şengal. Çira ma nêpawitî û rotî? Hemverê hêrişê serê ma de bêveng mendî. Heme dinya nê zana ke fek ma ra veradayî û remayî. Ma şî vernîya înan, ma çek waşt nêdayî ma. Ma waşt ke ma xo ver bidê la çek zî nêdayî ma. Çîyêk nêvatî û remayî. Vatêne Şengal Şengalê ma yo la fek ma ra veradayî û şî. Teberê Rayber Apo û wendekaranê ey tu kesî ma nêpawit. Heta ewro cinî û domanê ma bazaran de ameyî rotene. Gorê komî nêameyî akerdene. Çira nêşinê esîranê ma xelas nêkenê. Pêşmergeyî 2017 de şerê Xanesorî de domananê ma şehîd kerdî. Ez dayîkêke şehîdê Xanesorî ya. Ma do senîn înan qebûl bikerî? Yê ke domanê ma qetil kerdî, ma înan qebûl nêkenê. Wa pêro dinya bizano ke ê do nêagêrê serê herra ma.” ŞENGAL
