Domanêka 15 serre ke dewêka pabesteyê qezaya Kercewsî ya Êlihî de cuyena, çendêk verê cû semedê dejê pîzeyê xo şî nêweşxane û nêweşxanede ame zanayene ke na domane diganeya. Badê gerreyê domana ke raştê tecawuzî ameya di kesê binameyê M.A û V.A.yî ameyî destbendkerdene û hedîse kewt çapemenî. Çapemenî de dayîşê hedîseyîra dima tehqîqat ame hîrakerdene û bi îdîayê îstismaro cinsî û fuhuşî nameyê 27 camêrdê ke tede çawişêk pispor, polîs û qorîcî zî estî hedîse de vîyareno. Labelê ame zanayene ke înan ra tena nameyê 11 camêrdan dosyaya de estê.
Goreyê malumatê ke ajansê ma resayî ci, tewrê domana 15 serre hemen dewe ra 2 cinîyî zî hetê nêkesan ra kirişnayî fuhuş.
Doman û cinî kirişîyenê fuhuş
Zanayîşo ke hemwelatijê ke nêwaştî nameyê xo bidî de yeno îdîakerdene ke şoforê atolyeya tekstîlî E.T. 2 cinî û domana ke na atolye de xebetîyenî bi çawişo pispor û polîsan dayo şinasnayene. Îdîayan mîyan de vajîyeno ke çawiş û polîsê cîya-cîyayî timî yenê atolye û badê qedîyayîşê karî û mabendayîşê karî de doman û cinîyan gênê xo het û şonê. Yeno vatene ke na hedîse 8 aşmîyo ke hetê xeylê kesan ra yena zanayene û nê 2 cinîyan ra yew 3 aşmî verê cû digane menda û dima ra doman ci ver şîya. Sewbîna îdîayan mîyan de yeno vatene ke derheqê babete de tay fotografî resayî verê destê keyayê dewe û keyayê dewe şoforê serwîsî E.T.yî reyde munaqeşe kerdo. Dima ra zî keyeyê mexduran rewşe pêhesîyayî û wayîrê atolye reyde munaqeşe kerdî û hêrişê şoforî kerdî.
Gelo Gercuş de se beno?
Hemelatîyo/a ke ma derheqê babete de zanayîş ci ra girewt wina va: “Çawuşo pispor esto, kafeyê û dikanê ey kîşte tekstîlî de yo. Nêzdîyê serrêke yo akerde yo. Kafeyê çawuşo pispor M.A.G. ray berdêne. Serê kafe de o vindeno. Mîyanê babete de nameyê polîsan zî derbaz beno. Polîsê trafîkî esto, ma eşnawit ke o zî desteştişê cinîyan kerdo. Qeza de verê mektebêk de bufeyê M.A.G. bi, o wext zî ame eşnawitiş ke xeylêk domanan rê desteştiş kerdo. Badê nê eşnawitişan, bufeyê xo pada. Dima ra çawuşo pispor kewt verê kafe. Çawuşo pispor M.A.G., E.T. yo ke şoforê serwîse yo û wayîrê tekstîlî zî mîyanê nê çîyan de yo. Cinîyan bi çawuşê pisporan dir danê şînasnayîş. Mabêntî kenê, pare xo gênê. Domanêke 15 serrî di rey bena digane, bi ci kurtaj kenê. No diganeyê ci yê hîrêne yo. Qeza de xeylê kesî na babete ra haydar ê la seba ke çawuşê pisporî mîyan de yê kes nêwazeno na babete ser o qisey bikero. Çîyêk ma zanê, di cinî û domanêk esta. La goreyê ke ma texmîn kenê hûmara cinîyanê ke kerdê mîyanê fuhuşî hîna zêde ya.”
Muxabira ma seba ke hedîse ser o cigêrayîş bikera, şî kafeyê çawuşo pispor û awêk girewte û dima ra zî ameye taqîbkerdene. Hetê polîsê taybetan ra vernîya ci ameye girewtene û persê, “Ti kam a? çira tîya de ya? Ti cigêrayîşê çi kena? Ti çira ameya qeza?” kerdî. ÊLIH
