Qezaya Pulurî ya Dêrsimî de erazîyê qasê bi 2 mîlyon 297 hezar û 700 metrekareyan şîrketêke rê ameyî tehsîskerdene. Hemwelatîyê Pulurî nê erazîyan sey cayê mera xebitnayêne. Dewijî qerqilîyenê ke bi nê hawayî heywankarîye zî hînî biqede. Ame parekerdene ke şîrkete do erazîyan de pê silanê kîmyewîyan zîret bikera û no zî tesîrê citkaran bikero ke ê zîretê tabîyî kenê.
Dewij û rêxistinanê komelê sivîlî vera tehsîsê erazîyan nêrazîbîyayîşê xo mojna û dest pê kampanyaya îmza kerd.
Citkar Yilmazî vat: ”Nê erazîyî seba ma qîm nêkenê, domanê ma vêşan ê. Ma do şorê ça? Eke nê nê erazîyan bigêrê dima ma û keyeyanê ma zî tîya ra fetilnenê. Nê aramîya ma herimnenê.”
Citkaranê Pulurî ra Serdarî zî vat: ”No erd rayîrê ma de yo. Cinîyî tede kinger, gulik arê danê, ma heywananê xo tede çarnenê. Eke no erd bêro kîrakerdene ma do zereyê ci de hepîs bimanê. Ma nêwazenê erazî bêro kîrakerene.”
Citkarê bînî Sînan Kayirî zî vat: ”Eke tîya bêro kîrakerdene zerar do bireso ma. Tîya verê berê ma yo. Heywanê ma tîya ra vaş wenê.” DÊRSIM
