Kollektîva Ji bo Avhewayê ya Ciwanan banga ‘ji bo avhewayê greva global’ li hemû ciwanên cîhanê kir. Tê payîn ku dê ciwan li hezar û 700 bajaran ji bo xwedîderketina li avhewayê dakevin qadan
Liv û tevgera ji bo xwedîderketina li avhewayê di demên dawî de bi taybet jî li temamiya cîhanê zêdetir dibe. Ji bo xwedîderketina li avhewayê bang li hemû ciwanên cîhanê hate kirin ku di roja înê de dakevin qadan.
Banga ji bo ciwanan a ‘ji bo avhewayê greva global’ li ser malpera youthforclimate.fr hate kirin. Di serî de li Ewropayê li tevahiya cîhanê, li 90 welatan ji bo 1700 bajaran plansaziya çalakiyan hate kirin. Li Fransayê jî dê li 90 bajaran çalakî bên lidarxistin.
Kollektîva ‘Ji bo avhewayê ciwan’ bal kişande ser hilbijartina parlamentoya Ewropayê ya di 26’ê gulanê de û wiha got: “Hilbijartina Ewropayê hilbijartina avhewayê ye. Em bang dikin ku nemaze li ber avahiyên Banqeya Navendî ya Ewropayê ya li Frankfurtê, li ber avahiya Parlamentoya Ewropayê (PE) ya li Strasbourg û Brukselê kom bibin. Divê Yekitiya Ewropayê (YE) guh bide guherîna avhewayê û polîtayên der barê avhewayê di ser her tiştî re bigire.”
Li Fransayê 85 sendîka û komeleyan bang kir ku her kes tev li çalakiyan bibe, tê payîn ku di roja şemiyê de li 80 bajaran meş bên lidarxistin û çalakiya ajotina bisiklêtan bê lidarxistin. Di 15’ê gulanê de li Fransayê zêdetirî 200 hezar kes ji bo xwedîderketina li avhewayê daketin qadan. Li temamiya cîhanê jî zêdetirî milyonek kes daketibû qadan.
