Endama Koordînasyona KJK’ê Besê Erzîncan beşdarî ‘Bernameya Taybet’ a Medya Haberê bû û bersiv da pirsên Mûstafa Karaman.
Erzîncan di destpêka axaftina xwe de bi wesîleya salvegera berxwedana Rojiya Mirinê ya Mezin a 14’ê Tîrmehê, Mazlûm Dogan, şehîdên berxwedana 14’ê Tîrmehê bi bîr anî û bal kişand ser girîngiya vê berxwedanê ji bo Kurdistan û Rojhilata Navîn.
Erzîncan destnîşan kir ku berxwedana Rojiya Mirinê ya Mezin a 14’ê Tîrmehê li dijî polîtîkayên înkar, tunekirin û qirkirinê yên di dema 12’yê Îlonê de li dijî gelê kurd hatin meşandin, pêk hat.
Besê Erzîncan di dewama axaftina xwe de diyar kir dewleta tirk hewl dide li Rojhilata Navîn û cîhanê weke modeleke faşîst tevbigere û anî ziman ku hem li hundir hem jî li derve bi polîtakeyeke faşîzan, êrîşkar, mêtinger û dagirker nêzîk dibe.
PKK hêza bingehîn a azadiyê ye
Erzîncan diyar ku rejîma AKP-MHP’ê bi rêya êrîşkariyê hewl dide temenê xwe yê desthilatdariyê dirêj bike, mayinde bike û wiha domand: “Vê pêla neteweperestiyê ya navxweyî hem ji bo dengan hem jî bi nêzîkatiya siyasî, îdeolojîk hewl dide mezintir bike. Lewma bi êrîşa li ser Heftanînê re dixwaze vê yekê bêhtir mayinde bike. Bêguman tevgera me PKK ji dema ava bû û pê ve her mezin bû, bi pêş ket. Veguherî hêzekê ku hem li Rojhilata Navîn hem jî li cîhanê bibe mûxatab. Bû aktorekî girîng ê siyasî. Hebûna gelê kurd ji nû ve destnîşan kir.”
Besê Erzîncan bi bîr xist ku ev êrîş ne tenê li dijî PKK’ê ye û ev tişt anî ziman: “Êrîşa tê kirin êrîşeke berfireh e li ser dîroka kurdan, kurd û Kurdistanê. Ne êrîşeke ku tenê li dijî partiyekê yan jî rêxistinekê tê kirin. Êrîş li dijî hebûna gelê Kurdistanê, li dijî destketiyên gelê Kurdistanê ye. Ev êrîş ne tenê li dijî kurdan e, li dijî azadiya gel û jinên Rojhilata Navîn e. Li ku derê azadî û demokrasî hebe, li ku derê jinan û gelan hebûna xwe destnîşan kiribin, dewleta tirk êrîşê dibe ser wê derê.
Niha nêzîkatiya hin hêzan heye. Ne pêkan e ku dewleta tirk a faşîst bi derfetên xwe yan jî bi hêza xwe êrîşên wiha berfireh pêk bîne. Ne ji aliyê siyasî ne jî ji aliyê aborî û leşkerî ve hêzeke xwe ya bi vî rengî nîne. Hem ji rewşa krîzê ya li herêmê û cîhanê hem jî ji pêvajoya şewbê sûdê werdigire û bi vî rengî li nava sînorên xwe heta li Lîbyayê êrîşê dike. Ne pêkan e ku vê yekê bi tena serê xwe bike. Bêguman nêzîkatiya hin partiyên kurdan di vir de heye.
Şerê li Heftanînê ne şerekî welê ye ku dewleta tirk bi tena serê xwe hatiye li Heftanînê şer dike. Ger ne ji hêzên li wir be, em bêjin; ger ne ji alîkariya PDK’ê be nikare bê Heftanînê û şer bike.”
Erzîncan ragihand ku PKK ne tenê li dijî dewleta tirk her wiha li dijî hêzên hegemonîk jî têdikoşe û da zanîn ku dewleta tirk ji ber ku nikare vê operasyonê bi tena serê xwe bike, bi DYE û hêzên hevkar ên herêmî re dike.
Ger PKK’ê lawaz bikin dê hêzên din ên demokrasiyê jî lawaz bikin
Di berdewama axaftina xwe de Erzîncan destnîşan kir ku PKK hêza bingehîn a azadiyê ya li Kurdistanê ye û wiha pêde çû:” Hewl dide mirovên azad biafirîne. Xwedî bername, îdeolojî û projeya jiyaneke alternatîf heye. Bi pêşengiya Rêber Apo xwedî projeyeke jiyanê ye. Lewma êrîş li dijî kurdên azad, jinên azad, mirovahiya azad e. Ger di sedsala 21’an de hêzên demokrasî û azadiyê bibin yek û têkoşîneke mezin bimeşînin, dibe ku jiyaneke alternatîf bê afirandin. Êrîşa tê kirin ji ber vê yekê ye.”
Endama Koordînasyona KJK’ê Besê Erzîncan da zanîn ku hêzên hevkar ên herêmî di nava xefletê de ne û ev tişt anî ziman: “Ger dewleta tirk PKK’ê lawaz bike wê hêzên din ên demokrasiyê jî lawaz bibin. Wê hewl bide destketiyên kurdan hemûyan têk bibin. Ne tenê tirk wê li dijî gelek gelan têbikoşin. Ev yek ji bo Îranê jî ji bo dewleta tirk jî bi vî rengî ye. Dewletên heyî yên li herêmê naxwazin ku bi tu awayî kurd bibin xwedî statuko, bibin xwedî azadiyê û mafên xwe. Ev yek ji bo Sûriyeyê jî wiha ye. Tirkiye pêşengiyê ji vê polîtîkaya qirkirinê re dike û bi piştgiriya dewletên din dixwaze kurdan bi temamî tasfiye bike, biqedîne. Di şexsê PKK’ê de dixwaze vê yekê li gelan hemûyan bike. Hedefeke girîng jî Îran e. Piştî van hewldanan hemûyan wê dor bê Îranê.”
Berxwedana gerîla
Besê Erzîncan destnîşan kir ku di serî de li Heftanînê li çiyayên Kurdistanê hemûyan berxwedaneke mezin a serketî heye û wiha domand: “Bi taybetî li dijî gotinên ‘Di vê demê de girîngiya îdeolojiyan nemaye, girîngiya têkoşîna gerîla nemaye’ tevgera me, tevgera jinê bi kar û sekna xwe ya vê demê ji bo mirovahiyê bûne hêviyeke mezin. Her çiqas bi zanistî û teknîk bi pêş ketibe jî gerîlayên PKK’ê li dijî hêza NATO’yê di nava berxwedaneke mezin de ne. Vê yekê bi rengekî serketî dikin. Îro gerîlayeke/î me berdêla hezar leşkerên tirk e. Hem bi berxwedana xwe hem jî bi sekn û nêzîkatiya xwe ev yek gelek caran dubare kiriye. Em berxwedana gerîla silav dikin. Bêguman berxwedana gelê me jî heye. Gelê me îro li Rojhilata Navîn veguheriye gelê herî têgihiştî. Rastiya jinên azad heye. Li ser vê bingehê seknekê nîşan dide.”
Çavkaniya bingehîn berxwedanê
Endama Koordînasyona KJK’ê Besê Erzîncan ragihand ku jinên kurd bi pêşengiya îdeolojiya Rêberê Gelê Kurd Abdullah Ocalan bi pêş ket, bûn xwedî îrade û hêzeke mezin a rêxistiniyê û wiha got: “Jinên kurd niha li qadên siyasî, civakî, li nava gerîla û li nava her karî bi rola sereke tevdigerin. Di kar, pratîkê û bicihanîna îdeolojiya me ya azadiyê de bi rola sereke radibin. Lewma dîmanîka azadiyê û berxwedanê ya bingehîn a têkoşîna azadiyê ya kurd in. Ciwan û jinên kurd çavkaniya berxwedanê ya bingehîn in. Em dibînin ku bi berxwedana jinan civak li ber xwe dide û pêşengiyê dike. Mînaka berbiçav a vê yekê li Rojava ye. Cîhanê ev yek dît.”
Erzîncan bi bîr xist ku herî dawî li Rojava li dijî endamên Kongreya Star, li dijî jinên li Efrînê, jinên li bakurê Kurdistanê, herî dawî li dijî Rojbîn Çetîn bi kûçikan êrîş hate kirin û ev tişt diyar kir: “Girtina jinan û îşkenceya li wan nîşan dide ku konsepteke taybet heye. Di şexsê jinên kurd de hewl didin têkoşîna azadiyê ya kurd têk bibin, qirkirinê bikin. Têkoşîna me ya jinan ne tenê têkoşîna neteweyî, têkoşîneke jinan e. Hem nakokiya çînî, hem ya neteweyî hem jî ya jinan di nava têkoşîna me de bi xurtî tên temsîlkirin. Jinên kurd îro pêşengiyê ji têkoşîna bindestan hemûyan re dikin. Ne tenê ji jinên kurd re her wiha ji yekitî û têkoşîna hevpar a jinên li Rojhilata Navîn re jî, ji civakê û bindestan hemûyan re pêşengiyê dikin.”
Li her derê têkoşîna jinan heye
Her wiha Endama Koordînasyona KJK’ê Besê Erzîncan axaftina xwe wiha bi dawî kir: “Têkoşîna azadiyê ya Kurdistanê bi giştî têkoşîna jinan e. Li dijî sîstema bi serweriya mêr, têkoşîna azadiya jinan e. Eniyeke bi vî rengî heye. Li ser vê bingehê êrîş tên kirin. Li dijî vê yekê jî berxwedaneke mezin heye, raperîn û serhildaneke mezin heye. Redkirin heye. Ev êrîş dê bi tu awayî neyên qebûlkirin. Jin û ciwanên kurd, êrîş çi dibe bila bibe, konsepteke qirkirinê çawa dibe bila bibe, bi berxwedana xwe ya mezin, bi gerîla, jin, ciwan, gel û extiyarên xwe dê li ber vê yekê rabin û bi ser bikevin.” BEHDÎNAN
