Ji bo şermezarkirina êrîşên dagirkeriyê yên dewleta tirk û xwedîderketina li YPG û YPJ’ê, bi pêşengiya Tevgera Ciwanên Şoreşger a Sûriyeyê li Amûdê meşek hat lidarxistin. Di meşê de hat gotin ku ew qetilkirin, desthilatdarî û dagirkeriya li ser xaka xwe red dikin û piştgiriyê didin şervanên YPG û YPJ’ê
Tevgera Ciwanên Şoreşger a Sûriyeyê bi armanca şermezarkirina êrîşên dagirkeriyê yên dewleta tirk û çeteyên wê û piştgiriya bi şervanên YPG û YJ’ê re, li Amûdê bi dirûşma ‘Em banga derxistina dagirkeriya tirk ji xaka xwe dikin’ meşek li dar xist.
Di çalakiyê de bi dehan şêniyên Amûdê, endamên Tevgera Ciwanên Şoreşger, partiyên siyasî û saziyên civaka sivîl jî amade bûn. Meş ji qada Jina Azad a Amûdê dest pê kir. Di meşê de wêneyên qurbaniyên di êrîşên dewleta tirk de hatine qetilkirin, alên HSD, YPG û YPJ û Tevgera Ciwanên Şoreşger hatin hildan.
‘Eyn neviyên Mogolan; dar û kevir jî we red dikin’
Her wiha ciwanan pankartên ‘Ey neviyên Mogolan; dar û kevir jî we red dikin’, ‘Bi navê xwe û navê gelê Sûriyeyê em banga derketina dagirkeriyê ji xaka xwe dikin’, ‘Sûcdarê qatilê zarokan ji xaka me derkeve’ û ‘Li dijî êrîşên Tirkiyeyê yên li ser herêmên Bakur û Rojhilatê Sûriyeyê serî hildin’ vekiribûn. Ciwanan di meşê de bi dirûşman berxwedana şervanên YPJ, YPG û HSD’ê silav kirin û dagirkeriya dewleta tirk jî şermezar kirin.
Bang li hemû ciwanan kirin
Meş li qada Şehîd Cîhad veguherî mîtîngê. Di mîtîngê de endama Tevgera Ciwanên Şoreşger a Sûriyeyê Awaz Hesen axivî û wiha got: “Em êrîşên dagirkeriyê yên dewleta tirk ên li dijî Bakur û Rojhilatê Sûriyeyê şermezar dikin. Weke ciwan em qetilkirin, desthildarî, dagirkerî û zêdegaviyên li ser xak û gelê xwe qebûl nakin. Ji me ciwanan tê xwestin ku li dijî faşîzmê her tim amade bin û bendên koletiyê bişikînin. Em bang li tevahî ciwanan dikin ku tev li YPG û YPJ’ê bibin.”
Mîtîng bi dirûşmên dilosoziya bi şehîdan re û silavkirina biratiya gelan bi dawî bû. QAMIŞLO
