Meclisa Ciwanan a HDP’ê li Enqereyê kursên zimanê kurdî vedike. Roja dawî ya qeydên qursê jî 13’ê cotmeh e. Endama Meclisa Ciwanan a HDP’ê Betul Unsal jî bang li ciwanan kir ku tev li kursê bibin
Meclisa Ciwanan a Partiya Demokratîk a Gelan (HDP) li Enqereyê li dijî polîtîkayên pişaftinê, kursên zimanê kurdî vedike. Roja dawî ya qeydên kursê 13’ê cotmeh e. Dê kurs li avahiya HDP’ê ya Çankayayê bên dayîn. Der barê mijarê de endama Meclisa Ciwanan a HDP’ê Betul Unsal axivî û diyar kir ku ew li dijî polîtîkayên pişaftinê kursên zimanê kurdî vedikin û divê her ciwan xwedî li zimanê xwe derkeve.
Di berdewamê de jî Unsal bi lêv kir ku ew ji Colemêrgê ye lê belê zimanê xwe baş nizane û wiha domand: “Bi taybet jî me ev xebat ji bo ciwanên mîna min ên demên dirêj li metropolan man û zimanê xwe ji bîr kirine, da destpêkirin. Kêm zêde ez bi kurdî dizanim lê dema ku bi mezinan re diaxivim pirsgirêkan dijîm. Em nikarin pêwendiyên baş danîn. Ji bo vê jî me ev xebat da destpêkirin.”
Bang li ciwanan kir
Herî dawî jî Unsal ev tişt destnîşan kir: “Pirsgirêkeke sereke ya kurdan, pirsgirêka ziman e. Êrîşên li ser ziman, çand û wêjeya kurdan, êrîşa li ser bêhnstendina me ye. Lewma em heta ji destê me tê li dijî van polîtîkayên dewletê li ber xwe didin. Em ê bi van kursan li dijî polîtîkaya pişaftinê têbikoşin. Ez bang li hemû ciwanan dikim ku tev li kursan bibin.” ENQERE
