Bi sedan welatiyên Cizîrê tevî parlamenterên HDP’ê yên Şirnexê, çûn şîna malbata Pamay û sersaxî ji malbatê re re xwest. Di sersaxiyê de parlamenter Hasan Ozguneş diyar kir ku bêdengî mirinê bi xwe re tîne û divê tecrîda li ser Ocalan bi dawî bibe
Girtiyê siyasî Mahsûm Pamay (22) ji bo şermezarkirina tecrîda giran a li ser Rêberê Gelê Kurd Abdullah Ocalan, li Girtîgeha Jimar 1 a Tîpa T ya Xarpêtê çalakiya fedaî pêk anî û jiyana xwe ji dest da. Cenazeyê Pamay îro di bin dorpêça polîsan de li Goristana Asrî ya Cizîr a Şirnexê hate oxirkirin.
Piştî definkirina cenazeyê Pamay, malbatê ji bo şînê li Mizgefteka li Taxa Dagkapi ya Cizîre şîna xwe danî. Bi sedan welatiyên Cizîrê jî bi awayekî girseyî çûn cihê şînê û sersaxî ji malbata Pamay xwest. Di heman demê de parlamenterên HDP’ê Hasan Ozguneş û Huseyîn Kaçmaz û namzetên hevşaredariyê yên Şaredariya Cizîrê Mehmet Zirig û Bêrîvan Kutlu jî tev li girseyê bûn.
Bêdengî mirinê tîne
Di merasîma sersaxiyê de parlamenter Hasan Ozguneş di serî de sersaxî ji malbatê xwest û anî ziman ku malbatên zarokên wan di grevê de ji Amedê çûn Enqereyê û xwestin daxwazên zarokên xwe bînin ziman. Ozguneş diyar kir ku li girtîgehan çalakiyên greva birçîbûnê berdewam in û ev tişt diyar kir: “Lê hêj hikûmet li hemberî daxwazên girtiyan bêdeng e. Hevalên me yên li girtîgehê ji ber vê bêdengiya hikûmetê ji bo dengê xwe bilind bikin dawî li jiyana xwe tînin. Ji bo em rê li ber mirinê bigirin, divê em beriya her tiştî tecrîdê bi dawî bikin û daxwazên girtiyan pêk bînin. Bêdengî mirinê zêde dike. Divê em dengê xwe bêhtir bilind bikin û vê bêdengiyê xera bikin.” ŞIRNEX
