Hefteyo bîn şarê Kurdî û şarê heme dinya rayêke bîne bî şahidê bêînsafî û nemerdîya desthilatanê na dewlet e. Cop û tehnê ke Gebze de hetê hêzdaranê AKP/MHP ra deyayne paşta dayan ro eynî wext de deyayne zerre heme şarê Kurdî û wijdanê heme merdimahî ro. Neheqî û bêqanûnîya ke na desthilatî bi tecrîd şarê Kurdî ser de pêk ana bi hêrîşê aye yê ro dayanê Kurdan rayêke bîne verê çimanê merdimahî de ame ravistişî. Her copa ke deyayne paşta dayanê hepsîyan ro ke bi aşman o grevê veyşanî de yê merdiman merdimahîya xo ra fedî kerdêne. Her tehna ke deyayne dayan ro wijdanê merdimahî bêwijdaniya nê hêzdaranê desthilatî ra şerm kerdêne.
Rayêke bîne ma bî şahid ke emirqûlê netewedewletan eşkenê çiqas merdimahî ra vecîyê û desthilat û rayedarê netewedewletan neyratîya xo ya dayan rê û dayan ser de şaran rê vecê kam dereceyî ser. Dayê bi hestanê xo, bi heskerdişê xo yê merdimahî rê, bi heskerdişê xo yê heme estbîyayîşanê xoza rê û bi xususîyetê xo yê ardişê dinya yê merdimahî civake dinya de cayêke muhîme gênê. Dayê temînatê aştî, weşî, hizûr û verdewamîya merdimahî yê. Loma kulturê heme şaranê dinya de zî temamê bawerîyan de zî cayêke înan o pîroz esto. La na desthilatîya tekparêze ke bi kuçe de vindarnayîşê cenazeyê dayîka Taybete bêhurmetîya xo ya dayan û merdan rê zehf akrede û eşkera moştib ra bi tehndayîş û copkerdişê dayan rayêke bîne nîyetê xo yê şarê Kurdî ser de merdimahî rê da ramoştişî. Çande Kurdan de mudaxeleyke dayan esto ke şerran dano vindarnayîşî.
Mîyanê Kurdan de wexta cinîyêke leçege xo bierzo mîyanberê her di hetanê ke şerr kenê ca de her di hetî têra benê û peynî ro şerrê mîyanberê jobînan anê. Dayan bi eştişê leçega xo ya sipaye şerrê tewr giranî ke mîyanberê merdiman de virazyayê zî vindarrnayê. Nê şerrê çewres serrê peyînan de ke hetê dewleta dagirkere ra şarê Kurdî ser de yeno verdewamkerdişî dayê Kurdan semedê vindarrnayîşê şerrî zehf rayan leçegê xo eştî raşte la na desthilatîya ke neyartîya Kurdan xo rê kerda sey peywirêke pîroz î yew û nîme xo ra nêamîya war, zilm û tehdaya xo şarê Kurdî ser de verdewam kerdo û hêrîşê dayanê ke teberê aştî de waştişêke înan desthilatî ra çinêyo bi xo zî kerdo û hema zî kena. Eyro roc zerre nê dayanê ke teberê aştî û têduştiya mîyanberê şaran de ti waştişêke înan çinêyo bi helyayîşê bedenê ewldanê xo dicena û peretêna.
Roc bi roc bedenê ewldanê înan helêno û tedir zerre înan perretêna. Bi çalakîyanê xo wazenê nefesêke bideyo ewldanê înan, wazenê na desthilatî bêhiqûqî û faşîzmê xo ra verra bido û wezîfeyê xo hiqûqî, demokrasî û merdimahî bîyaro ca la, her hewe de no waştişê înan o meşrû û heqdar hetê na desthilatî ra bi awayêke heqaretî û darê zorî raşte ra yeno wedartişî. Copa na desthilatî ke nê waştişê dayan ser de gunayne paşta dayan ro pîl ra heta qican zerra heme şarê Kurdî dicna, tîr û jan vist wijdanê înan. Cop û tehnê ke hetê hêzdaranê na desthilatî ra ro dayan ameyê dayîşî ro heme şarê Kurdî ameyê dayîşî. Loma lazim o şarê Kurdî sere de ro hemverê tecrîdî ro hemverê heme awayî heqaretanê na desthilatî vengê xo veco.
