Dewa Tekke ya Çorumî de perey şan muxtar û lajanê ci pê kardan hêrişê karkeranê serrewextî yê rihayîjan kerd. Hêriş de Hatîce û Kubra Alpa, Halep û Îsmaîl Çalişir û Alî Sarigul birîndar bîyî. Birîndarê ke wedarîyayî nêweşxane dima ke ameyî weşkerdene nêweşxaneyî ra vejîyayî.
Derheqê serebûtî de endamêkê keyeyê Îbrahîm Çalişirî Ajansê Mezopotamya rê qisey kerd û ard ziwan ke mengêke verî awa mergê Bozbagî hetê dewan ra ameye birnayene.
Çalişirî derheqê hêrişî de vat: ”Şiwano ke xalê muxtarî yo çend reyî ma rê vat ‘Çopanê xo meerzê erdî.’ Ma zî vat ma çopanê xo nêerzenê, eqsê ci her roje uca pakî kenê. Vizêr dima ke ey hêga de çend poşetî dîyî cendirmeyan rê telefon kerd. Cendirmeyan zî muxtarî rê telefon kerd. Muxtar û astsubayêk ameyî. Astsubay qîra ma ser û vat ‘Ez şima tîya ra şawena. Şima do tîya ra şorê. Ez do nêmeyê şewêke bêra şima tîya ra wedarna.’ Ma zî ci rê vat heqê ci çin o ke biqîrê ma ser. Ma vat ma do gerrayê ey bikerê.
Dima astsubayî venga ma da. Wexto ke ma astsubayî reyde qisey kerdêne muxtar, lajanê ci û dewijêkê bînî pê kardan hêrişê ma kerd. Hêriş de babîyê mi Halep Çalişir û birayê mi Îsmaîl Çalişir birîndar bîyî. Emika mi Hatîce Alpa semedo ke mabênê înan bivîna ameya. Înan da amika mi ro, ê mabênî de kênaya amika mi Kubra Alpa zî milê xo ra birîndar bîye. Xebatkatê ma Alî Sarigul zî sereyê xo ra birîndar bi. Wextê şerî de astsubayî gazê îsotî eşt ma ser, paştî daye hêrişkeran. Têna ma rê mudaxele ame kerdene.”
Çalişirî da zanayene ke hêrişî ra dima cendirmeyan îfadeyê înan girewto û înan zî gerreyê astsubayî û muxtarî kerdo. Çalişirî pare kerd ke înan xeymê xo wedaritî û şîyî dewêka bîne. Çalişirî ard ziwan ke dima ke ê heqê mera bigêrê do abigêrê Riha. ÇORUM
