Li Wanê coş û kelecana pîrozbahiya 8’ê Adarê Roja Jinan a Cîhanê dest pê kir. Jinên wanî ji bo beşdarî mîtînga 8’ê Adarê ya di pêşengiya Tevgera Jinên Azad (TJA) û Meclisa Jinan a Partiya Demokratîk a Gelan (HDP) de tê lidarxistin bibin, berê xwe dan Parka Musa Anter a li Navçeya Rêya Armûşê ya Wanê. TJA û Meclisa Jinan a HDP’ê bi şîara “Em li dijî qirkirina jinan jiyanê, li dijî tecrîdê azadiyê diparêzin” mîtingê li dar dixe. Jinên herikîn qada mîtîngê, qad bi nepoxên spî û xemrî xemilandin. Dîsa pankarta “Serhildana me ji bo azadiya me ye” vekirin.
Bi sedan jinên ku ji Agirî, Qers, Îdîr û Colemêrgê hatibûn jî herikîn qada mîtîngê. Jin bi tevlêbûna Berdevka Meclisa Jinan a HDP’ê Ayşe Acar Başaran bi cilên herêmî û neteweyî dimeşin qada mîtingê. Jin bê navber dirûşmeyên “Bijî berxwedana jinan” û “Jin, jiyan, azadî” berz dikin. Jinên ketin qadê li ber stranên Koma Deşta Gever govend girtine.
Berdevka Meclîsa Jinan a HDP’ê Ayşe Acar Başaran dê di mîtîngê de bi axive û Hunermend Pinar Aydinlar stranan bêje. WAN
