Merkezê Pêroyî yê Komeleyanê Elewîyan ê Demokratîkan (DAD) derheqê nîqaşanê serê ‘Dêrsim’î de eşkerayîyêka nuştekîye daye. Eşkerayîye wina ya:
”Her roje nameyê cografyaya Erdê Dewreşî û sere de Seyîd Rizayî erjê şarê ma bi ziwanê nefretî yenê hedefkerdene. No çi bi di metodan yeno kerdene; bi ziwanê nefret û kînî yenê kerdene û ziwan, nasname û bawerîya Dêrsimî sey dişmenî yenê dîyene. Metodo diyîn zî no yo ke tay kesî zî wina mojnenê ke Dêrsimî qebul kenê la dima cade hêrişê erjanê Dêrsimî kenê û bi nê hawayî kenê ke şarî ra rayan bigêrê.
Vîrê ma de yo ke 2011 de Erdoganî qaşo senî ‘Dêrsimî ra efû waşta’ û Wekîlê CHPyî Onur Oymenî zî senî Meclîs de heqaretî kerdî. Ewro mabênê Bahçelî û Ozgur Ozelî de zî heman çi qewimîyeno. Nê wird serebûtî zî çimê ma de eynî yê.
Dêrsim seba ke qey ferasetê dewlete yê teperest û merkezperestî tehluke bibi terteleyêko pîl dibi. Êyê ke nê dejanê Dêrsimî de têrî nênê name û erjanê Dêrsimî kenê hedef ke ma do qetî ney qebul nêkerê.
Ma do nimûneyanê sîyasetmedaranê pragmatîstanê ke mexdûr û qirkeran zereyê heman cumle de yad kenê, tim teşhîr bikerê; vera ferasetê faşîstî yo ke Dêrsimî îmkar keno zî tim têkoşîn bikerê.
Dêrsim seba ma nameyêko basîd nîyo! Nameyê Dêrsimî temamîya erjanê ma yê tarîx, herr, kultur, erd, ziwan û komelî ya! Çew nêeşkeno seba rantê sîyasîyî nê nameyî bişuxilno! Û çew nêeşkeno û do nêeşko no name mezgê ma ra biestero!”
