Di 18’ê tîrmeha 2016’an de li bajaroka Xirwate ya Gever a Colemêrgê, dema welatiya bi navê Surmî Înce xwarina zarokên xwe yên giha didûrin dibir, leşkera gulebaran kiribû û qetil kiribû. Der barê qetilkirina Înce de 3 sal û 4 meh ceza li çawîşê pispor Alî Dagkirin hatibû birîn. Lê belê Dadgeha Îstînafê ya Erziromê cezayê li Dagkirin hatibû birînü, xera kir. Dadgehê di biryara xwe de got; ‘Cezayê li Dagkirin hatiye birîn zêde ye’ û dosye careke din ji dadgeha herêmî re şand.
Têkildarî mijarê kurê Înce yê parêzer Bunyamîn Înce axivî û ev tişt anî ziman: “Di 18’ê tîrmeha 2016’an de bi fermana Fermandarê Qereqola Bajaroka Xirwateyê Muharrem Goç, 8 leşker ji du wesayîtên zirxî dadikevin û ferdên malbatekê gulebaran dikin. Li wir dayikek tê kuştin. Di doza Surmî Înce de 3 sal û 4 meh ceza li leşkerê bi navê Alî Dagkirin hate birîn. Lê dadgeha îstînafê ev ceza pir dît û xera kir. Di biryara xwe de bal nekişandiye ser tu xaleke daxwaznameya me.”
‘Ev biryar karesateke hiqûqî ye’
Înce bi domdarî jî wiha got: “Dadgeha herêmî li cihê bûyerê lêkolîn nekirine. Daxwazên rapora pêzaniyê yên ji bo wesayîtê û dîmenan qebûl nekiriye. Ev biryar berdewamiya polîtîkaya bêcezatiyê ye. Ev biryar karesateke hiqûqî ye. Em ê li dijî vê biryara bêcezatiyê têbikoşin. Dê danişîna dozê di 14’ê nîsana 2020’an de li Dadgeha Cezayê Giran a Geverê bê dîtin. Ez bang li hemû kesî dikim ku tev li danişînê bibin.” COLEMÊRG
