5’emîn Dadgeha Cezayê Giran a Amedê biryar da ku hevseroka KCD’ê Leyla Guven a 140 roj in li dijî tecrîdê di greva birçîbûnê de ye bi zorê bibin danişînê
Der barê hevseroka KCD’ê û parlamentera HDP’ê ya Colemêrgê Leyla Guven ku ev 140 roj in li dijî tecrîdkirina Rêberê Gelê Kurd Abdullah Ocalan di greva birçîbûnê ya bêdem û bêdorveger de ye, 6’emîn Dadgeha Cezayê Giran a Rihayê bi sûcdariya ‘Endamtiya rêxistinê’ doz vekiribû. Bi hinceta ku Guven îfade nedaye dadgeha Rihayê, li 5’emîn Dadgeha Cezayê Giran a Amedê danişîna Guven a bi ferman hat dîtin.
Guven di 4’ê Nîsana 2017’an de beşdarî pîrozbahiya rojbûna Ocalan a li gundê wî Amara ya Xalfetiya Rihayê bibû û hatibû binçavkirin û piştî hat berdan doz lê hatibû vekirin. Heman doz li xwişk û birayê Ocalan, Fatma Ocalan û Mehmet Ocalan jî hatibû vekirin.
Guven a 140 roj in di greva birçîbûnê de ye nikaribû beşdarî danişînê bibe û parêzerê wê Serdar Çelebî di danişînê de amade bû.
Çelebî parastina miwekîla xwe Guven kir û got ku ji ber di greva birçîbûnê de ye nikare beşdarî danişînê bibe û diyar kir ku ew dixwazin doza miwekîla wî bi dawî bibe û bê beratkirin.
Dadgeha daxwaza Çelebî red kir. Dadgehê biryar da ku nivîsa muzakereyê ji polîsan re bê nivîsandin û Guven bi darê zorê bînin danişînê û doz taloq kir. AMED
