Dadgeha Meletiyê li endam û rêveberên HDP, DBP û ÎHD’ê yên ku di 27’ê mijdara sala 2018’an de hatibûn binçavkirin, ceza birî
Polîsên dewlet tirk di 27’ê mijdara sala 2018’an de li Meletiyê hevserokê Partiya Demokratîk a Gelan (HDP) a Meletiyê yê berê Ozcan Agdaş, hevseroka Partiya Herêmên Demokratîk (DBP) a Meletiyê Nermîn Tuncel, hevseroka Şaxa Komeleya Mafên Mirovan (ÎHD) a Meletiyê Gonul Ozturkoglu, hevserokê HDP’ê ya Navçeya Battalgaziyê Ahmet Aksu, hevserokê HDP’ê ya Navçeya Yeşîlyûrtê Azîz Dogan, rêveberê HDP’a Meletiyê yê berê Hasan Karvar û endamê HDP’ê Ahmet Tûran Sertkaya binçav kiribûn. Piştre jî Hasan Karvar hatibû berdan û 6 kesên din jî bi îdiaya ‘Endamên rêxistinê ne’ hatibûn girtin.
Di danişînên hatibûn dîtin de her 6 kes jî hatibûn tehliyekirin. Danişîna biryara dozê ya siyasetmedaran du roj berê li Dadgeha Meletiyê hate dîtin. Dadgehê li Azîz Dogan salek û 8 meh, li Ahmet Aksû salek û 8 meh ceza birî û cezayê wan taloq kir. Dadgehê li Gonul Ozturkoglu 6 sal û 3 meh, li Nermîn Tuncel 6 sal û 3 meh, li Ozcan Agdaş 6 sal û 3 meh û li Hasan Karvar jî 6 sal û 3 meh cezayê girtîgehê birî. Dadgehê der barê Ahmet Turan Sertkaya de jî biryara beraetê da.
‘Biryareke siyasî û derhiqûqî ye’
Têkildarî mijarê seroka Şaxa ÎHD’ê ya Meletiyê Gonul Ozturkoglu axivî û diyar kir ku biryar hiqûqî nîne û biryar bi temamî siyasî hatiye dayîn. Ozturkoglu destnîşan kir ku ew ji ber xebatên xwe yên mafên mirovan ên komeleyê hatiye cezakirin û wiha bi dawî kir: “Ez bang li dadger û dozgeran dikim ku guh bidin hiqûqê û li gorî hiqûqê tevbigerin.” MELETÎ
