Sîlopî de qedexeyê tebervejîyayîşî de 3 sîyasetmedarê cinîyî ameybî qetilkerdene û nê serebûtî ra dima 4 serrî vîyartî la hema zî sucdarî nêameyî hukmkerdene.
5ê çeleyê 2016î de qezaya Sîlopî yê Şirnexî de qedexeyê vejîyayîşê teberî de Endama Meclîsê Partîya Herêmanê Demokratîşî (DBP) Sêvê Demîr, Endama Kongera Cinîya Azade (KJA) Fatma Uyar û Hemsereka Meclîsê Şarî yê Sîlopî Pakîze Nayir wexto ke taxêke ra derbazê taxêka bîne bîyêne wesayîtêkê zirxînî guleyî înan ser o varnayî û 3 sîyasetmedarê cinîyî qetil kerdî. Qetilkerdişê înan ra dima 4 serrî vîyartî. La heta nika derheqê serebûtî de kesêk zî nêame hukmkerdene.
Tehqîqatê dewaya qetilkerişê sîyasetmedaranê cinîyan de gamêke zî nêameye eştene. Derheqê dosyaya dewa de bira nimite esta. Keyeyê sîyasetmedaranê cinîyan zî pawenê ke kiştoxê kênayanê înan bêrê dîyene. Dadîyanê her 3 sîyasetmedaranê cinîyan qala kênayanê xo kerde û edalet waşt.
Dadîya Fatma Uyar Hatîce Uyar vat: “12 serrîya xo ra nata şîyêne partîye. 5 serrî û 3 mengî zîndan de mende. Dima ke agêraye tîya ameye qetilkerdene. Heta ke ez weş biba ez do dewaya kênaya xo ra fek vera nêda. Ma pê aye sereberz ê. Aye rayîrê ma roşnî kerd. Her roje vîrê mi de ya.”
Dadîya Pakîze Nayir Behîye Nayir vera nêhukmkerdişê kiştoxan nêrazîbîyayîşê xo mojna û vat: ” Nê qetilkerişan ser o çen serrî zî bivîyarî ez peyê na dewa de ya. Pakîze partîye de zî keye de zî zaf xebatkar bîye. Pakîze sivîlêke bîye la ameye qetilkerdene. Nêverdenê ke ez persê kiştoxanê kênaya xo bika. Wexto ke ez qala ci kena derheqê mi de dewayêke akenê.”
Dadîya Sêvê Demîr Sakîne Demîr zî vat: “Sêvê welatperwere bîye. Wayîrê şarê xo vejîyaye. Seba ke welatê ma de haştîye bêra awankerdene têkoşîn kerd. Sêvê waştêne ke cinîyî tewrê têkoşînî bibê. Kênaya mi dima ke zîndan ra vejîyaye verê çimanê dinya de ameye qetilkerdene. Ez venga cinîyan dana ke wa yew bibê.” ŞIRNEX
