Zîndanê Hewlêrî de tepişteyî Mazlûm Dag û Abdurrahman Er vera tedayanê PDKyî 33 rojî yo grevê vêşanîye de yê.
Er û Dagî 18ê gulane de vera ferzkerdişê kincê hemanî grevê xo dabi destpêkerdene.
Abdurrahman Er û Mazlûm Dagî 28ê êlula 2022yî de zî dest pê grevê vêşanîye kerdbî û seba ke waştişê înan ameybî qebulkerdene roja 14. de grev qedînabî.
Wird tepişteyan 13ê sibata 2022yî de zî vera binpaykerdişê heqan rojeyê mergî dabi destpêkerdene. Dima ke soz amebi dayene ke binpaykerdişî biqedê, înan zî roja 9. de peynîya çalakîya xo ardbî. HEWLÊR
