Hêrişê dewleta tirkî ya dagirkere û çeteyê aye yê vera Rojawanî dewam kenî. Dagirkerî dewa Um El Kêfî û dewa Qasimîye bombardûman kerdî. Seba dewêke zî sewqîyatê çekan yê giranan ame kerdene. Qezaya Zîrganî ya Serêkanîyê de teqayîşê mayinêkê dagirkeran ra serkewte di leşkerê rejîmê Sûrîye birîndar bîyî
Hêrişê dewleta tirkî ya dagirkere û çeteyê pabesteyê aye yê vera rojawanê Kurdistanî bêmaben dewam kenî. Her çiqas ke mabenê DYA û Tirkîya de adirbirnayîş bêro îlankerdene zî dewleta tirkî ya dagirkere û çeteyê aye seba hîrakerdişê sînoran bi çekanê giranan hêrişanê xo domnenî û şervanê Hêzê Sûrîyeya Demokratîke (HSD) ke zî çarçeweya pawitişê meşrû de derbê giranan danî dagirkeran ro.
Dewleta tirkî ya dagirkere bi koordînasyonê teyarayanê keşfî, bi obus û hawanan bombayî varnayî dewanê Qasimîye, Rihanîye, Mahmûdîye û Dawûdîye yê Til Temirî ser. Dagirkerî çeteyanê xo reyde bi çekanê giranan resayî dewa Îngîlî ya Til Temirî. Goreyê xeberanê ke herême ra ameyî teyareyê şerî yê dewleta tirkî dewa Um El Kêfî ya Til Temirî bombardûman kerdî.
Dewêka qezaya Zîrganî de teqayîşê mayinêkê dagirkeran ra serkewte di leşkerê rejîmê Sûrîye birîndar bîyî. Birîndarî ameyî berdene bi nêweşxaneyê Heseke.
Teqayîşê Silûk û Ezazî
Sewbîna ame zanayene ke nizdîyê firnê siyahî yê bajarojê Silûkî ya pabesteyê Girê Spî ke binê kontrolê dewleta tirkî û çeteyanê aye de yo de teqayîşêko pîl virazîyayo. Goreyê xebranê ewilan merde û birîndarî estî. Dewêk girêdayeyê Ezazî de zî teqayîş pê ame. Derheqê teqayîşî de tu xeberêk zelal çin a.
