Danişîna 14’emîn a Doza Komkujiya Pirsûsê dê îro li 5’emîn Dadgeha Cezayên Giran a Rihayê hate dîtin. Şandeya dadgehê ji ewil bi hinceta tevdîrên li dijî vîrûsa koronayê (Covîd-19) biryar da ku danişîn bê parêzer pêk bê.
Têkildarî mijarê parêzerê malbatan Serdil Îzol axivî û diyar kir ku tu astengiyên Wezareta Dadê ya li dijî parêzerên mexdûran nîne lê belê dîsa jî şandeya dadgehê li gorî serê xwe biryar daye. Îzol ku ji bo şopandina danişînê çû edliyeyê daxwaz kir ku negirtina wan a danişînê divê di girtekan de bê nivîsandin. Dadgehê li ser vê yekê destûr da ku Îzol beşdarî danişînê bibe
Bersûcê girtî Yakûp Şahîn bi rêya SEGBÎS’ê beşdarî danişînê bû. Şahîn mafê xwe yê bêdengmayînê bi kar anî. Piştre jî Îzol parastin kir û got: “Berî vê danişînê me gilî kiribû. Em dixwazin ku dosyeya melayê mizgeftê Abdullah Omer Aslan ê di dema bûyerê de bi ala DAIŞ’ê ve hatibû girtin, bi vê dosyayê re bibe yek.” Lê dadgehê ev daxwaz red kir û danişîn taloqî 18’ê tebaxê kir.
Hêjayî bibîrxistinê ye ku di Komkujiya Pirsûsê ya di 20’ê tîrmeha sala 2015’an de ku li ber Navenda Çandê ya Amara ya Pirsûsê pêk hatibû, 33 endamên Federasyona Komeleyên Ciwanên Sosyalîst hatibûn qetilkirin. RIHA
